Minister Dangui Oduber - *2,119 persona a haya nan prome dosis
ORANJESTAD (AAN): Siman pasa minister Dangui Oduber conhuntamente cu DVG, SVb, AZV, ATA y AHATA a anuncia e vacuntahon 3.0 cu A tuma lugar diadomingo 22 augustus 2021.
E vacunathon aki tabata hopi importante considerando e situacion actual di Covid-19 nan Aruba y tambe e demanda cu tin pa vacuna na Aruba.
E situacion actual na Aruba ta hopi tenso. No tin espacio di ICU na nos hospitalnan, tin un grand cantidad di pashent cu Covid ta wordo manda Colombia y hospital ta bao di un presion enorme.
E data cu ta ricibi for di hospital ta indica cu mas di 81% di esnan hospitalisa no ta vacuna. Esaki ta un indicacion cla cu e vacuna ta duna resultado cu nos ta buscando.
Den fin di siman gobierno mester a escala varios medida na momento cu hospital a bati alarma. No a keda nos otro, aunke con dificil e decisionnan por ta, pa introduci mas medida pa baha e contagio y baha e presion cu tin na nos hospital. Na momento cu nos no por garantiza cama mas pa patientnan esaki ta un problema hopi serio.
A haci un yamada na comunidad di Aruba pa bai masalmente vacuna y nos ta hopi contento y agradecido cu un biaha Aruba a responde na e yamada pa bay vacuna. For di mainta trempan a nota e entusiasmo den e hendenan pa vacuna y e dia tabata uno hopi fructifero y exitoso.
A pone como meta pa por vacuna entre 2000-2500 persona riba 1 solo dia y a logra e cantidad di 2119 persona.
Como minister di salud mi kier a gradici di curason un biaha mas cada un persona. Cu a bay vacuna, ministerio di turismo, salud publico y deporte, henter e team di vacuna di DVG, tur e voluntarionan di SVb/AZV, ATA, AHATA y sigur un danki special na Ritz Carlton pa pone nan ballroom disponibel un biaha mas pa logra un otro vacunathon super exitoso.
Ban sigui cuida, ban sigui laba nos mannan frecuentemente, ban sigui mantene distanciamento social, ban sigui bisti masks y ban tur hunto den union sali for di e crisis aki. "Mi ta convenci cu hunto den union nos lo vence", Oduber a expresa.
