Señora Sary Wernet-Kelly, Terapista di Revalidacion na FAVI
- Sea cauteloso. Bo bista ta algo valioso, pues cuid’é
ORANJESTAD (AAN): Segun World Health Organization (WHO), aproximadamente 2.4 biyon persona na mundo tin problema di bista. Mayoria di esaki ta causa pa miopia (wak leu), hipermetropia (wak cerca) y otro desaroyo ocular cu no a wordo detecta of coregi na tempo. Señora Sary Wernet-Kelly, Terapista di Revalidacion na FAVI, a comparti cu DIARIO, den conexion cu siman di conscientisacion di Garoti Blanco cu Strepi Cora, cu tecnologia tambe ta un factor cu por contribui na perdida of problema di bista— no di inmediato, pero si despues di tempo.
FAVI ta recomenda cuidadanonan pa pone atencion na e cantidad di ora cu nan ta pasa usando tecnologia manera laptop, computadora, tablet y celular. No ta aconsehabel pa keda concentra constantemente riba pantalla sin tuma pausa pa relaha e bista of mira otro direccion.
Señora Wernet-Kelly a enfatisa cu ta crucial pa haci un control di bista regularmente, pa por detecta problema tempran. Muchanan cu tin famia cu ta bisti bril mester haya un evaluacion visual cerca un especialista, pa si ta necesario haci un coreccion durante nan edad chikito of hoben, y asina preveni deterioro di bista.
Pa esnan cu ya ta bisti bril, e conseho ta pa sigui haci un chekeo anual pa verifica si e receta ainda ta corecto. Pa esnan cu ta pasa hopi tempo dilanti di pantalla, ta sugeri pa busca bril cu filtro special (blue light filter) pa yuda preveni daño ocular.
“Prevencion ta cuminsa cu nos mes. Sea cauteloso. Bo bista ta algo valioso— bo tin cu cuid’é. Meta di FAVI ta pa yega na tur hende cu tin problema di bista, pero esaki no ta significa cu nos kier mas hende cu problema. Nos kier previni esaki,” Señora Sary Wernet-Kelly a conclui.
