Fin di Augustus ta hiba nos na culminacion di temporada di horcan - Grace na Mexico y Henri na Merca a duna prueba di e realidad 2021 - Yobida pisa ta trece biento cu ta mas peligroso y hospital ta yen
ORANJESTAD(AAN)- Pa basta dia DIARIO a cuminsa splica cu Aruba mester presta atencion na un forma particular na e realidad di temporada di horcan y e situacion di Covid-19 cu mundialmente a conoce un ola nobo.
Na entrada di e ultimo siman completo di Augustus 2021, manera for di fin di siman tabata tin indicacion, condicionnan di tempo na Aruba tabata haci posibel pa e isla a conoce yobida, strena y lamper pero tambe biento fuerte cu ta uno di e peligernan mas grandi di un sistema tropical.
Ayera un ola tropical a drenta noticia na Aruba, cu ta biba cu e realidad cu su hospital ta completamente yen, cu sector di cuido y sector medico, mescos cu tur e servicionan cu mester duna prome asistencia na Aruba tabata completamente ocupa cu e ola nobo di Covid-19 tal manera DIARIO a adverti cu por socede.
For di fin di siman pasa por a nota un area grandi di presion abou na entrada di region di Caribe, caminda tabata wordo papia tambe di un disturbio na e nivelnan mas halto cu ta un sistema friu di tempo pero tambe por ocasiona basta actividad.
Na entrada den Caribe e ola tropical cu lo a afecta Aruba, lo no tabata tin mucho chens pa sigui activa pero segun e pronosticonan di National Hurricane Center, e lo por sigui activa despues den region di Caribe.
Na mes momento por a mira con den un solo dia a nace dos sistema mas den Atlantico manera e grafico ofcial ta indica. E portret di satelite ta duna un bista di e cantidad di actividad riba e islanan ABC ayera merdia.
Hopi bez ora ta papia di actividad di sistemanan tropical ta pensa solamente riba e peliger di awa drenta cas cu sigur den tempo di Covid-19 ta fastioso.
Manera DIARIO a indica a base di sucesonan na Europa, caminda cambio di clima a trece basta mal tempo, biento ta e elemento cu mas problema por causa.
Den pasado Aruba tabata atento cu construccionnan di cas. Por ehempel den construccion di casnan por mira e diferencia grandi di un cas cu a wordo construi den pasado y casnan cu hopi bes ta wordo construi den poco tempo.
Den e casnan bieu por mira con e construccion ta evita cu biento ta bay cu un dak cu tur e peligernan cu esaki ta causa.
Peliger grandi sigur por mira den uzo di trailernan como vivienda pero tambe e forma cu casnan cu no ta apto pa vivienda ta wordo adapta.
Aki tin un peliger grandi no solamente pa habitantenan di e cas pero tambe pa tur miembro di gruponan cu mester duna asistencia si biento bay cu e dak cu por bira un proyectil contra otro hende y otro propiedad.
E medidanan di Covid-19 ta haci cu mas hende por keda cas. E condicionnan di tempo actualmente ta mustra cu temporada di horcan pa Aruba tambe, a yega na e momentonan di culminacion.
Na Merca alarma di tormenta a wordo bati na New York, loke ta duna prueba cu horcannan y sistemanan tropical no ta tene nan mes na limitacion cu nos kier introduci.
Na Mexico Horcan Grace dos bes a subi tera y destruccion enorme a wordo causa den tempo di pandemia.
Atrobe mester mustra riba peliger cu ta existi den un temporada di horcan cu ta culmina pa Aruba, na momento cu atrobe medidanan extrema a wordo tuma pa Covid-19 cu resultado pa hospital dokternan, personal di cuido, autoridad, ambulance, y tur cu mester duna asistencia ora un dak bula bay of otro condicionnan peligroso haci cu hende mester di asistencia!
