ORANJESTAD (AAN): E cantidad grandi di pakinan y cargamento di marihuana cu tanto Polis y Ehercito Colombiano a logra confisca ultimo simannan na departamento di La Guajira na Colombia,
lo por ta e motibo cu e momentonan aki tin scarcedad di e yerba aki na Aruba, y ta afectando e usadornan.
Sinembargo e por ta un efecto tambe cu Cuerpo Policial di Aruba awor tin un ‘Team Drugspanden’ hopi activo, cu ta subiendo caya y tene razzia na varios “punto di benta” na cas of cualkier garage bao palo, unda tin bendemento scondi di marihuana of cocaina.
Pues tin varios bendedor chikito di droga cu a cay cera. Fuera di esey tin varios transporte di droga cu a faya barbaramente y nada di dropping a socede pa asina e mercado local tin yerba fresco di marihuana pa uso di hendenan riba e isla.
Pero hecho si ta cu tur dia, cumpradornan di marihuana ta yamando paki-paya pa mira unda nan por haya un sakito cumpra pero ta birando dificil. Como cu e demanda a crece, tin algun rebendedor cu a hasta hisa prijs. Awor bo no por haya nada di 15 Florin mas cumpra, pasobra tur paki chikito di ‘weed’ awor ta sea 25 Florin of hasta 50 Florin minimo.
E accion di Polis- y Ehercito na Colombia, como tambe trabao riba lama di Guardacosta di Caribe Hulandes, y tambe US Coast Guard den henter Caribe, y tambe personal di Control di Droga DNCD na Republica Dominicana, y CBP Patrols rond di Puerto Rico enberdad a cuminza kibra e cadena di suministro di droga fresco pa mercadonan di Caribe, di Merca, y tambe pa Europa.
Riba Diaranson mes, oficialnan di DNCD na Republica Dominicana a logra intercepta y confisca 83 paki yena cu cocaina, na un finca na municipio di Samaná. E droga cu por ser mira riba e potret aki suministra pa autoridad Dominicano, a bisa cu nan a logra haya sa unda tin droga scondi basa riba informacion di inteligencia.
Varios persona cu tabata na e finca, a rek pia y huy ora cu nan a mira Polis a yega. Autoridadnan a sigui busca den tur e zona, y na final a haya 3 bulto grandi den cual tin total di 67 paki di cocaina.
Despues nan a confisca un Hyundai SUV cu a wordo laga atras, y den dje a bin haya 16 paki mas, pa asina e bira un total di 83 paki.
