Parlamentario Hendrik Treveden: *Esaki ta e caso tambe pa Eagle LNG
ORANJESTAD (AAN) – Den conferencia di prensa di fraccion di MEP, Parlamentario Hendrik Treveden a hiba palabra y a elabora tocante e tema di LNG, cu a wordo trata Dialuna y Diamars den reunion publico di Parlamento, pa sigui Diaranzon trata e tema di Presupuesto.
E parlamentario a enfoca den e ocasion aki, riba e asunto di LNG. El a trece dilanti cu den e reunion di Diamars, tabata tin un discrepancia y falta di credibilidad riba e proceder con e proceso di LNG a bay.
Treveden a mustra e 'US Government Advocacy Policy', unda cu ta indica cu tur e companianan Mericano cu ta haci negoshi cu otro paisnan, manera Eagle LNG den e caso aki, mester mantene nan mes na e principionan cu ta stipula den e 'US Government Advocacy Policy' aki.
E parlamentario a splica cu el a pasa riba dos diferente punto di e policy, aunke logicamente tin hopi mas, cualnan ta masha simple, y unda ta bisa cu nan mester ta di acuerdo, ora nan ta busca medionan comercial pafo di nan pais, esta Merca, cu nan no por compromete nan mes cu ningun tipo di “bribery” (soborno) ni ningun asunto publico cu tin conexion cu esaki.
Treveden a agrega cu por wak cu tur e puntonan cu el a menciona Diamars den Parlamento, cu prome cu e hendenan di Merca a sali mes pa bin negocia na Aruba, tin un linea stricto cu nan tin cu atene na dje, como parti di e negociacion cu a tuma lugar.
E parlamentario a señala cu pa fraccion di MEP, esaki a keda hopi bon splica tanto Dialuna como Diamars den e reunion publico, unda cu e profesionalnan a duna tur indicacion di con pakico Aruba mester di LNG gas aworaki na Aruba, pa haci e transicion pa por yega na energia renovable manera di solo y biento.
