ORANJESTAD (AAN) – Comision Celebracion Dianan Nacional, Fundacion UNOCA, Fundacion Chico Harms, Fundacion Cultural di Festival Folclorico Dande y Himno y Bandera, Comision Promove Cultura y SETAR, a bin hunto den un conferencia di prensa, pa presenta locual ta bay bira e actividadnan di Dande 2022.
Lyonel Dirks, di Comision Celebracion Dianan Nacional a menciona cu e Festival di Dande 2022 ta
programa pa tuma lugar otro siman, dianan 27, 28 y 29 di December.
El a bisa cu Ministerio di Cultura y Departamento di Cultura, ta hopi contento di cuminza promove e Festivalnan aki. El a yama bon bini na UNOCA, cu pa prome biaha ta partner hunto cu e Comision Celebracion Dianan Nacional, pa asina aki por engrandece hopi mas e tres festivalnan di Dande.
Despues cu a sinta cu e tres organizador, cu ta señor Chico Harms, di Fundacion Chico Harms, e Comision di e Festival Infantil y Hubenil y e Comision Festival di Adulto, cu por cierto e aña aki ta cumpli 50 aña di nan Festival.
Dirksz a indica cu nan a yega na cierto conclusionnan pa pone tur e tres festivalnan aki hunto, pero riba fechanan separa, pa duna pueblo di Aruba tur e tempo, pa por celebra cada un festival den nan concepto y edadnan diferente den e tradicion di Aruba su Festival di Dande.
Cuminzando 27 di December lo ta bay tin e show di Dande na Centro di Bario Brasil, y 28 di December lo ta na Centro di Bario Tanki Leendert, pa celebra e Festival Infantil y Hubenil, y finalmente dia 29 lo tin e Festival di Adulto, cu lo ta celebrando su 50 aña, den Club Caiquetio.
Seguidamente, Ray Anne Hernandez, director di UNOCA, a hiba palabra y a indica cu e aña aki nan a dicidi di forma un partnership cu Comision Celebracion Dianan Nacional, Departamento di Cultura y Ministerio di Cultura, pa asina hunto nan por engrandece loke ta e festivalnan di Dande na Aruba.
Pa varios aña UNOCA ta yuda, individualmente, e tres Festivalnan aki, sea di un of otro forma, y tin biaha un so ta aplica, of dos ta aplica, pero e aña aki a dicidi cu UNOCA kier duna realze na Aruba su tradicion. E tradicion di Dande ta algo unico na Aruba. Nan a pensa di acerca e Comision Celebracion Dianan Nacional, pa asina forma un bunita partnership aki, pa asina e tres festivalnan por haya un sosten mas grandi cu loke nan ta haya normalmente.
Señor Chico Harms, cu ta organizando e show di Dande den Centro di Bario Brasil, di su banda a bisa cu e ta contento cu e dos fundacion menciona a uni, pa asina e festival di Dande bira ainda mas grandi y e ta spera cu e aña aki tambe bira un gran exito.
Pa loke ta e show, Harms a bisa cu si no ta pa e pandemia, esaki lo a bira e di 53 aña cu a organize.
Nan a cuminza den Colegio Cristo Rey y despues cu e Centro di Bario a habri e show a bin akinan. E aña aki tin 17 grupo participante. E show lo cuminza atardi 6.30 or, pasobra 17 grupo ta hopi, y nan kier caba entre 12 or mei anochi cu 1 or marduga.
Harms a extende un invitacion na e bario di Brasil y Aruba completo pa bin presencia e actividad aki y tur tres festival. Trahando conhuntamente, nan ta bay den bon caminda pa e actividadnan aki keda na bida.
