Di awe Dialuna 8 te Diabierna 12 di April:
ORANJESTAD (AAN) – Rayane Hernandez, Directora di UNOCA, a yama un conferencia di prensa na e sala di exposicion di Archivo Nacional, pa duna informacion tocante un simposio cu, conhuntamente, e partnernan di Coleccion Aruba ta organizando.
“Manera ta conoci, na September ultimo, e Plataforma Coleccion Aruba a lanza e website coleccion.aw, oficialmente. E website aki, cu ya caba ta birando popular, ta un plataforma unda nos por busca y haya informacion tocante Aruba. Na momento cu nos a cuminza cu e plataforma aki tabata tres partner cu ta UNOCA, Biblioteca Nacional y Archivo Nacional. Mientras tanto, nos tin diesun partner den e coleccion aki, unda diferente instancia gubernamental y no gubernamental (NGO’s) ta pone nan coleccion di informacion historico y cultural riba e pagina aki, p’asina por haci e informacion accesibel pa e comunidad di Aruba”, Rayane Hernandez a relata.
Hernandez a sigui informa cu den e simposio aki lo bay trata e herencia digital di Caribe Hulandes.
Awe, dialuna 8 di April, lo ta lanzando e mesun website aki, pero den un bachi nobo. “Nos ta bay presenta su bachi nobo. E website aki ta unico den Reino, y practicamente na mundo, mirando tin diferente aspecto cu ta hacie apart. Banda di e parti di colaboracion cu mi a menciona caba, nos ta e unico lugar te aworaki unda bo por coba den documentonan bieu, usando inteligencia artificial pa lesa textonan, cu normalmente nos, di e generacion aki no por lesa mas”, Rayane Hernandez a señala.
El a splica cu inteligencia artificial ta lesa esaki cu e asina yama “hand text recognition” di documentonan colonial. “Y tambe loke ta haci e colaboracion aki y e plataforma aki unico ta cu banda di e colaboracion local tin un colaboracion internacional tambe, cu diferente partners di rond mundo; tanto na Merca como den nos mesun Reino”. Directora di UNOCA a splica. E simposio lo tuma lugar di awe te Diabierna 12. Kiermen henter e siman aki.
