Na Memoria
ORANJESTAD (AAN): Dia 7 di april 2026 Aruba a tuma despedida di un boluntario ehemplar conoci como juf. Baly.
For di UNOCA a ricibi e siguiente relato, cu ta mustra cu desde aña 2005 te 2015 Anuesca Baly a forma parti di directiva di UNOCA. Anuesca a wordo apunta den directiva door di Gobierno di Aruba na 2005 y el a ehecuta e encargo di miembro cu pasion, disciplina y dedicacion.
Tocante su miembresia den directiva, por remarca cu Anuesca tabata tin vision pa educacion, produccion di material educativo cultural y democratisacion di arte y cultura. Anuesca tabata pone hopi enfasis riba diferente punto cu ta regarda e peticionario, esta e persona of instancia cu ta haci un peticion pa realisa un proyecto cu sosten financiero di UNOCA. E puntonan ta entre otro garantisa calidad, responsabilidad y cumplimento di e reglanan y palabracion di parti di peticionario.
Anuesca semper tabata prepara su mes debidamente pa participa den e reunionnan di directiva. Su contribucion ta constructivo, critico y husto, pero cu bista pa engrandece e sector cultural.
Pa e personal di UNOCA, Anuesca tabata juf. Baly, y su presencia so tabata demanda profesionalismo. Tur cos cu Anuesca a traha riba dje el a haci cu amor y dedicacion. Anuesca tabata un comisario di “walk the talk” cu un stimacion enorme pa su pais, educacion general y educacion cultural. Aruba lo sinti falta di e gran dama aki kende a empeña semper un trabao duro, pa asina laga atras algo mihor di loke el a haya prome.
Anuesca ta laga atras un bunita fundeshi y legado pa nos por sigui traha.
UNOCA ta extende su palabranan di condolencia na su casa, famia, coleganan y amigonan. Anuesca drumi dushi den brasa di Señor.
