Pa sostene Aruba su mesun talentonan:
ORANJESTAD (AAN) – Den e sede di UNOCA a tuma lugar un conferencia di prensa, den cual a duna informacion tocante un obra di teatro yama “Amiganan pa semper” skirbi pa Faritah Luidens.
Tabata presente Ray Anne Hernandez, director di UNOCA, ken a haci e introduccion, Faritah Luidens, Stanley Dabian y Edjean Semeleer.
Hernandez a expresa cu pa UNOCA ta un orguyo di por forma parti di un proyecto asina. El a bisa cu no ta pa kita ni pone, pero Aruba ta presenta hopi comedia di afo cu ta haya sosten di comunidad, pero Aruba tambe tin hopi talento di calibre internacional y pesey UNOCA a dicidi pa financia e proyecto di Faritah.
UNOCA ta kere den desaroyo di arte y cultura, y e ta mira cu e parti di teatro, e ultimo añanan no ta hayando e balor cu e merece, ni sosten di comercio, y UNOCA si a dicidi, hunto cu algun otro partner, pa sostene e proyecto aki, cu por wak e talentonan Arubiano, riba tarima di Cas di Cultura den e caso aki, y pa e comunidad di Aruba tambe por presencia un obra cu ta presenta door di nos mesun hendenan.
Den otro articulo DIARIO lo sigui elabora tocante e proyecto aki.
