ORANJESTAD (AAN); Awe den DIARIO por lesa un entrevista cu Rector Viola Heutger di Universidad di Aruba,
kende a bisa cu nan plannan pa expande y sigui bay dilanti ta numeroso.
Cada biaha tin mas studiante cu ta bin acerca, incluyendo studiantenan di exterior cu ta escoge e Universidad di Aruba pa bin sigui nan estudio. E ampliacion di estudionan ofreci, incluyendo chens pa finaliza obtene bo grado di Master’s, ta un di e atraccionnan pa bin Aruba.
Universidad di Aruba a logra haya cooperacion pa huur algun espacio cerca nan bisiña di Centro Educativo Cristian, unda awor nan tin un sala di estudio mas grandi, y espacio extra pa oficina.
Nan tin bista riba e renobacion di Maria Convent, pa por haya espacio eyden tambe.
Pero algo cu a hala atencion, ta cu e Rector Heutger a bisa cu e ta spera cu Gobierno lo por crea algun lugar di hospedahe (yama na ingles como ‘dorm’, y tambe ‘studentenkamer’ na hulandes) den Caya Grandi.
Pues nan a nota cu tin hopi espacio bashi, principalmente na halto di edificionan. Esakinan por wordo converti den lugar pa studiantenan di exterior cu ta bin pa Universidad di Aruba, por hospeda aden. E ora nan tin di cana djis entre 450 pa 600 meter so pa yega Universidad y vise-versa.
