Sue-Ann Lee, Decano Facultad Hospitalidad & Turismo:
*Un fondo pa studiantenan di menos recurso
ORANJESTAD (AAN) – Señora Sue-Ann Lee, Decano di e Facultad “Hospitality and Tourism Management Studies” di Universidad di Aruba, ta hopi gradici cu e aña, a bolbe haya donacion di SETAR NV, pa e fondo pa studiantenan.
Den un entrevista cu DIARIO, señora Lee a subraya cu SETAR ta contribuyendo pa tres aña caba, cu e fond aki cu ta pa studiantenan di menos recurso, cu lo mester di asistencia financiero den diferente forma, sea pa college geld, cumpra buki, y a wordo amplia aworaki pa si e studiante tin interes pero no por financia full un biahe pa un conferencia, of pa bay afo pa sigui desaroya durante nan estudio, e fondo aki lo yuda nan tambe.
“Tambe tin mas oportunidadnan eyfo cu nos kier brinda nos studiantenan, y cu un fondo asina ta hacie posible. Kiermen, nos ta hopi agradecido cu SETAR y Universidad di Aruba a yega na e posibilidad aki, pasobra hunto nan a cuminza cu e fondo aki tres aña pasa, y asina nos lo kier pa esaki sigui crece pa e studiantenan tambe por haya oportunidad na Aruba, pa sigui studia na Universidad, y tambe na mesun momento nan ta haya oportunidad internacional, si esaki wordo brinda”, señora Lee a splica.
E dama a subraya cu UA ta hopi satisfecho. E aña aki a cuminza cu 256 studiante como prome aña. “Esey pa nos ta un bon nomber. E diferente facultadnan ta creciendo poco, poco y esey ta mustra cu e interes tey pa keda Aruba y sigui studia. “Y tambe por wak cu e programanan cu nos ta ofreciendo tambe tin e interes di studiantenan. Y manera ta conoci, UA ta traha hunto cu comunidad, y esey tambe ta haci cu e brug pa nan haya un trabao, oportunidadnan eyfo, pa traha part time tambe, ta creciendo y esey ta algo cu nos ta brinda door di ta akinan, y tin un bon lazo cu nos stakeholders eyfo”, Decano, señora Sue-Ann Lee a remarca.
Finalmente, el a expresa cu como Universidad nan ta hopi habri pa haya mas fondonan asina pa sigui crece e donacion aki, pasobra e ta pa studiantenan. “Nos kier brinda e studiantenan oportunidad, y si tin otro companianan cu tin interes pa participa, sigur cu si, nan por tuma contacto cu nos libremente, y nos ta dispuesto pa splica nan, y pa nan compronde kico tur ta e necesidadnan cu nos tin”, señora Sue-Ann Lee, a conclui.
