Señor Diego Acevedo
ORANJESTAD (AAN): United Farmers Aruba Association ta hibando discusionnan interno tocante ‘Food Sovereignty’ contrario na ‘Food Security’. Esaki ta loke cu Señor Diego Acevedo a elabora den un entrevista cu DIARIO.
Food Security kiermeen pa sigura cu tin acceso confiabel, pa tur hende, tur momento, na suficiente alimentacion cu ta sigur y nutritivo pa biba saludabel y activo. Un ehempel di esaki, segun señor Acevedo, ta durante Covid. Cuminda tabata yega nos isla, y hende tabata por a paga p’e.
Di otro banda, Food Sovereignty, ta e derecho di e comunidad pa defini, controla y sostene nan mesun sistema di alimento; scoge loke nan ta planta, con ta planta y con pa distribui loke nan ta planta of cultiva. Esaki ta duna sosten na agricultornan local, na metodonan di plantamento tradicional y produccion ecologico.
Na Aruba tin hopi productornan local, entre otro agricultura, cria y pesca. Ta importante pa yuda cada sector prome cu yega na logra Food Sovereignty na Aruba. Señor Acevedo a remarca cu paso a paso, lo yega na esaki. Discusionnan andando ta pa wak e posibilidadnan con pa yega na esaki pa e bira un realidad.
