Gino Maduro di Sindicato ABV:
- Crisis na Hospital afectando pashentnan caba
- Gasto di indocumentadonan a yega 28 miyon
ORANJESTAD (AAN): Tin ya caba un Sala di Operacion cera. Tambe tin un Sala di Endoscopie cera. Varios material quimico y necesario pa Laboratorio no ta wordo cumpra. Resultado ta cu tin tardanza enorme pa haya cierto resultado di Lab. Ya caba Docternan Specialista na Aruba a bati alarma.
Pero e alarma di mas fuerte ta wordo bati door di Sindicato ABV cu ta encarga cu esnan den Enfermeria. E president Gina Maduro a indica cu nan a cuminza move, y a sinta cu diferente stakeholder den tur e situacion aki.
Nan a sinta cu Directiva di Hospital. Nan a sinta cu Raad van Toezicht. Nan a bay cu un audiencia cu Ministro di Salubridad Publico, Mervin Wyatt-Ras riba Diabierna cu a pasa. Pues nan a notifica Gobierno di e urgencia di e situacion.
“Den nos concepto, e unico persona cu por trece e solucion temporal ta e Minister mes,” ta loke Gina Maduro di ABV a declara.
El a bisa esey, pasobra si bo mira e Landsverordening AZV artikel 26 y 39, ta duna e minister tur e espacio pa haci uzo di su ‘discretionaire bevoegdheid’ (poder discecional) y pa duna AZV instruccionnan conforme ley, pa duna e placa.
Tres investigacion: Mientras tanto tin tres investigacion ta bay cuminza. Uno ta pa Dialise Afdeling. A forma un comision consistiendo di representante di Hospital, representante di ImSan, dos di AZV, pa aisna bin cu un Dus, na forma un comision di e representante di hospital, di IMSAN, dos di AZV, pa bini cu un advies rapport pa minister.
Tambe kier haci otro investigacion, cu ta ‘Doelmatigheid Onderzoek’ pa check si placa, tempo y personal ta wordo uza lo mas optimal posibel pa logra yega na metanan. Di tres investigacion ta e ‘Lumpsum’ mes.
Pero pa Sindicato ABV, e urgencia aki no por keda warda resultado di tur e investigacionnan aki prome cu actua. Pesey nan ta boga pa un solucion temporal, mientras cu investigacion ta drenta, y asina mira con ta sigui mas leu. Pero no por hinca e continuidad di cuido den un peligro asina.
Gasto na hendenan indocumenta: Tambe Gina Maduro di Sindicato ABV a pone spotlight riba e hecho cu Hospital ta dunando servicio na un grupo di hende, anto hopi servicio... pero no ta haya e placa bek.
Aki e ta referi na e grupo di hendenan indocumenta, y cu ta casi 28 miyon Florin caba ta bayendo.
Con e ta ser haci na otro islanan? Por ehemplo na Corsou, gobierno di Willemstad ta duna Hospital CMC e suma di 10 miyon Florin Caribense pa aña y fin di aña ta haci ‘afrekening’. Pero na Aruba, no ta duna ni un cen, ni un florin ta duna pa e grupo aki. Pero Hospital si ta duna e cuido.
E president di ABV a indica cu na Aruba tin grupo di pashentnan di HIV cu ta haya e medicamentonan caro. Pero ken ta paga pe?
E pregunta ta, ta con largo Hospital por sigui duna cuido gratis mientras tanto tur e gastonan ta aumentando?
Corda cu e edificionan remodela, Hospital no a bay dilanti den cama no, mas bien a bay atras den cama. Tur dia ta full-full house akinan. Tur e cambernan ta bezet pasobra poblacion a crece. Corda cu 10 mil asegurado a bin di bek ultimo dos añanan aki. Bo tin turismo, hotelnan ta habri, mas camber di hotel y akinan tin menos camber. Pues tin hopi presion di pashentnan cu ta aumenta, bo tin cu duna servicio. Produccion a subi pero e suma, e placa no ta e cifranan real cu ta cubri e gastonan di Hospital di Aruba.
