ORANJESTAD (AAN): Recientemente s a celebra e hecho cu Aruba a cumpli 35 aña como miembro di UNESCO
y durante un conferencia di prensa secretario general di UNESCO Aruba Marushka Tromp a papia riba e temanan cu UNESCO Aruba ta trata cu diferente stakeholder.
Tromp a cuminza cu e parti di educacion y a trece dilanti cu eynan e idea ta pa crea netwerk na tur nivel.
“E UNESCO Scholen ta 1 di esakinan, pero tin mas riba nivel di Universidad y scolnan profesional etc.”, segun Tromp.
El a sigui indica cu otro tema importante ta promocion di uso di lenga materno y multilingualismo.
Banda di esaki e enfoke ta bay ta riba transformacion di educacion, mientras cu e intencion ta tambe pa recursonan educacion ta habri pa tur hende.
Pa loke ta ciencia Tromp a indica cu UNESCO lo enfoca riba investigacionnan oceanico y crea cooperacion entre paisnan riba e tema.
Tambe ta bay enfoca riba alerta y preparacion pa Tsunami y entre otro aplica e programa di Global Geoparks.
Riba e tereno social e enfoke ta riba cumpli cu e convencio anti doping, duna importancia na deporte como instrumento cardinal den sociedad y yega na un sociedad incluso , unda cu tin un igualdad di genero y participacion di hoben.
Pa loke ta Cultura, dos di e puntonan cu Tromp a menciona ta cu ta bay traha riba Educacion Cultural y crea ciudadnan creativo.
Den comunicacion e enfoke ta bay ta entre otro riba fortifica e herencia documental y su digitalizacion, como tambe promove uso di recomendacionnan di etica di Inteligencia Artificial.
{gallery}UNESCO Aruba ta trahando riba varios punto di Cultura, Educacion, Comunicacion, Ciencia Natural y Ciencia Social{/gallery}
