Prome Minister Evelyn Wever-Croes - ORANJESTAD (AAN): Organisionnan di Nacionnan Uni pa Maneho di Genero, UN Women, ta desaroyando un Maneho di Genero pa Aruba
conhuntamente cu e Comision di Genero di Aruba y lo ta sesionnan cu lo cuminsa reanuda dia 16 di juni 2021.
Durante Dia Internacional di Hende Muhe aña pasa, Prome Minister Evelyn Wever-Croes a instala un comision di genero cu e tarea pa duna direccion y coordina e desaroyo di un maneho pa igualdad di genero pa Aruba.
Esaki cu sosten di y conhuntamente cu e organisacion di Nacionnan Uni pa Hende Muhe (UN Women). Entretanto mundo a wordo confronta cu e pandemia di COVID-19 y e organonan di Nacionnan Uni desafortunadamente a haña nan mes tambe ta desplega nan mes pa afronta e pandemia di COVID-19, pues e trabaonan no por a sigui segun locual tabata planea.
Entretanto for di algun siman UN Women, a reanuda e proyecto y ta bin ta trahando cu e Comision di Genero Aruba pa yega na un maneho holistico y coordina riba e tereno aki pa Aruba. Lo ta e prome maneho di Genero pa pais Aruba.
Pa tin un maneho cu ta refleha e necesidadnan den comunidad y ta beneficia interes general, e maneho di genero pa Aruba ta wordo desaroya por medio di un proceso participatorio, pues lo traha no solamente cu Gobierno pero conhuntamente cu organisacionnan cu ta traha den sector social, economico y medio ambiental. Mirando e situacion di COVID-19 na nivel internacional, e prome siguiente sesion cu diferente organisacionnan lo tuma luga di forma virtual dia 16 di juni venidero y lo wordo facilita door di UN Women.
Di parti di UN Women e proyecto ta wordo lidera door di e director di oficina regional di UN Women, sra. Tonni Ann Brodber, cu recientemente a asumi e posicion aki despues di e fayecimento inespera di su predecesor, Allison Turner. Sra. Turner a bishita Aruba den cuadro di e proyecto aki net prome cu COVID-19 y a tene sesionnan cu diferente stakeholders.
Pa tin un maneho cu ta refleha e necesidadnan den comunidad y ta beneficia interes general, e maneho di genero pa Aruba ta wordo desaroya por medio di un proceso participatorio, pues lo traha no solamente cu Gobierno pero conhuntamente cu organisacionnan cu ta traha den sector social, economico y medio ambiental. Mirando e situacion di COVID-19 na nivel internacional, e prome session cu diferente organisacionnan lo tuma luga di forma virtual dia 16 di juni benidero y lo wordo facilita door di UN Women.
E plan di maneho pa igualdad di genero lo mester tambe incorpora y contribui na diferente plannan existente, manera e Plan Nacional Strategico (NSP) y e plan di recuperacion economico y cu tambe lo contribui pa Aruba alcansa e metanan di desaroyo sostenibel, (SDGs) specialmente obhetivo #3, salud y bienestar, obhetivo #4, enseñansa di calidad, obhetivo # 5, igualdad di genero, obhetivo # 8, trabao y crecemento economico y obhetivo # 10, reduci desigualdad.
