Den entrevista cu Charisse Hoen-Daly di Universidad di Aruba:
ORANJESTAD (AAN) – Universidad di Aruba a presenta den College Fair 2024, cu un booth enorme y hopi bishita. DIARIO a acerca Charisse Hoen-Daly, puntre con tabata bayendo cu e interes cerca e studiantenan durante e apertura, Diabierna cu a pasa.
Charisse a comenta cu tin hende ta pensa cu ta un estudio so U.A tin, pero realidad ta cu nan tin seis programa di Bachelor, un Academic y cuater Maters, y hopi studiante a haya hopi informacion, y e interes tabata sublime, mas ora nan a scucha kico tur U.A ta ofrece, incluso e oportunidad di bay afo dentro di nan estudio akinan.
Un Universidad den crecemento:
“E ultimo añanan aki Universidad di Aruba no solamente a crece den su edificionan, pues a bira mas grandi, pero nos ta dunando mas estudio, y casi tur nos programanan ta acredita. Pasobra hopi biaha esey ta e pregunta”, Charisse Hoen-Daly a menciona. El a agrega cu por mira na Universidad hopi studiante stranhero tambe, pero ademas hopi docente. “Mi tin cu bisa cu e College Fair sigur ta duna nos oportunidad pa tur hende bin hunto, y ora nos tin un open dag, un dia informativo, nos ta duna un tiki mas informacion”, Hoen-Daly a acentua.
Y for di awo caba, e ta invita pueblo en general pa bin atende nan open dag di dia 3 di April 2025, p’asina nan por siña un poco mas di cada estudio.
“Y cu nos tin asina hopi cambio awo, y manera nan ta bisa bo tin cu sigui cu e cambionan cu tin den mundo, pa bo por wak cu bo opleiding ta keda vigente, y bo ta keda zorg cu e version di educacion cu nos ta duna, ta cuadra cu loke otro universidadnan na mundo ta haci.
P’esey mes, tur studiante cu ta bay Universidad di Aruba, tin oportunidad den nan penultimo aña pa bay afo, via Erasmus Founding p’asina aki nan haya un chens pa mey aña biba afo di Aruba, y alavez spaar placa, pasobra nan ta keda paga e mesun fee, anto bo ta haya un chens di bay Merca, Belgica, Inglatera, Francia, unda cu bo kier”, Charisse a duna di conoce. El a agrega cu e “Global Opportunities” ta cu bo ta haya un chens di studia afo, pero na mesun tempo conoce kico Aruba mester y conoce e mercado di Aruba.
“Hopi biaha loke bo ta siña afo, bo no por djis, copy paste hacie na Aruba. Bo mester conoce nos cultura, bo mester conoce e necesidadnan, bo mester conoce con bo por traha. Anto, esey bo por bisa cu na Universidad di Aruba bo ta haya e miho di tur mundo, pasobra bo ta haya un chens di bay afo, bo sa kico ta pasando na Aruba, y nos ta spera cu bo bin bek Aruba, pasobra Aruba mester di su hendenan, y bo ta haya un educacion riba nivel”, Charisse Hoen-Daly a relata.
