ORANJESTAD (AAN): Minister Glenbert Croes ta conciente di tur e retonan cu nos conciudadanonan ta enfrentando.
Aruba ta recuperando impresionantemente pero esey no ta kita cu calidad di bida pa factornan externo cu no ta di nos, tambe ta afecta.
Gabinete Wever Croes 2 como un ekipo, ta trahando duro pa mehora calidad di bida pa nos conciudadanonan, pa provee nos famianan cu calidad di bida digno y humano.
Como e titular di Energia, a anuncia un reduccion di tarifa di coriente entrante 1 mei, e prome paso den e proceso pa sigui baha e tarifanan mas ainda. Tambe a mandatario a recorda cu na principio di aña, a aumenta salario minimo, pa di 3 bes desde cu Glenbert Croes ta Minister di Labor. Desempleo ta bahando back. Si prome cu pandemia e tabata na 5.2%, te cu fin di 2022 e ta na 6.6%. Mas hende ta hayando trabao ademas cu ainda tin hopi demanda pa trahado, confirmando un mercado laboral hopi activo.
Pero corectamente manera e mandatario a informa, e salud y siguridad na pia di trabao tambe ta mes importante cu e salario. Felicidad na pia di trabao, ta progreso p’e compania. Salud y siguridad na pia di trabao ta haci cu e trahado ta traha cu animo na bienestar di e compania. “Un trahado motiva ta un trahado cu ta produci mas. Su productividad mester yuda e trahado haya un miho salario”, e mandatario a expresa. E ley cu lo regula salud y siguridad di e trahado na trabao, esta ARBO wet, ta canando su trayecto huridico pa finalmente yega Parlamento di Aruba pa un decision final.
E dia di Labor aki lag’e ta un reflexion di unda nos ta para, despues di e prueba grandisimo di pandemia. Nos ta recuperando. E trahado tambe mester recupera. Su salario mester recupera. E trabao mester recupera. Su bienestar y su futuro mester recupera. “Tur esaki ta pasobra mi ta convenci cu futuro di Aruba, futuro di economia di Aruba, ta bay depende di un trahado cu ta anima y progresando. Y esey ta e compromiso di Gabinete Wever Croes 2 y esey ta mi humilde compromiso como Minister di Labor”, Glenbert Croes a termina.
