ORANJESTAD (AAN): Despues cu Minister di Salubridad, Dangui Oduber durante un conferencia di prensa a anuncia cu dia 4 di Maart e proyecto Steps Aruba 2023 lo cuminza,
Dahariana Evertsz di Seccion Promocion di Salud di Departamento di Salud Publico a duna un splicacion mas amplio di e proyecto, cu ta uno pa colecta data riba salud di habitantenan di Aruba di entre 18 y 69 aña, pa yaya un mihor bista riba e situacion general di salud riba nos isla.
Evertsz a splica cu di Maart te cu Mei/Juni, Departamento di Salud Publico den cooperacion cu Pan American Health Organization (PAHO) y CBS lo acerca 5122 persona entre 18 y 69 aña, pa participa activamente na Steps 2023.
“Steps ta un investigacion bao di nos populacion, riba e factornan di riesgo cu por conduci na desaroyo di malesanan cronico y no transmisible manera cancer, obesidad, presion halto y diabetis”.
Steps ta un instrumento cu a wordo crea door di WHO y PAHO pa wordo uza pa colecta data y actualiza e maneho di programanan di salud y tambe pa haci intervencion pa loke ta nos comunidad na Aruba, segun Evertsz.
El a sigui bisa cu ultimo biaha cu e tipo di investigacion aki a tuma lugar tabata 17 aña pasa.
Segun Evertsz, awe e training ta cuminza pa e personanan cu ta bay haci e encuesta.
Na bo cas mes nan ta bin, unda cu 1 persona di cada famia a wordo escogi pa participa na e encuesta.
“E persona cu ta bin haci e encuesta mes ta bin cu su ekipo pues abo no mester prepara nada”.
E lo midi haltura, peso, presion etc. di e persona, mientras cu lo haci tambe un test di sucu y cholesterol”.
Si bo no por bay haci e test, nos lo ofrece esaki na bo cas, segun Evertsz.
El a sigui bisa cu mundialmente y na Aruba tambe malesanan cronico ta causanan principal di morto.
Segun Evertsz den transcurso di añanan cu a pasa custumber y trendnan nobo a haci nan entrada y pesey ta vital pa organiza un proyecto manera Steps.
