Tisa LaSorte, CEO di AHATA:
*Esaki ta crea sentimento negativo den e comunidad
ORANJESTAD (AAN) — Den entrevista cu DIARIO, CEO di AHATA (Aruba Hotel & Tourism Association), señora Tisa LaSorte, a splica tocante e reunion di e Conferencia Global, cu a tuma lugar na Aruba, cu participacion di 15 pais.
Esaki ta un momento importante tur aña, pa Aruba, pasobra AHATA ta invita tur su partnernan cu ta bende Aruba afo na e turistanan, pa nan bin conoce Aruba tur aña, pa wak ki nobo tin.
“Y nos tin combersacion cu nan, papia di lo ultimo, y el a bay bon. Semper nan tin hopi interes pa bin Aruba, den kico nos ta haciendo diferente, kico ta nobo.
E aña aki e topico grandi tabata e sentimento cu tin den comunidad contra ‘sobreturismo’. Mi ta kere cu ta importante semper pa señala cu tin un diferencia entre e necesidad pa tin un turismo exitoso na Aruba, pasobra esey ta e pilar di nos economia, pero pa bo por proteha e futuro di turismo, mester haci algo contra e sobre-turismo.
Esaki ta e problema cu e comunidad tin sentimento negativo contra dje y cu tin cu haci algo pa soluciona e problema aki. Anto, esey ta un combersacion cu ta tumando lugar den e senonan di industria, gobierno, y claro ATA tambe, y cual ta e siguiente pasonan cu mester tuma pa por controla esey. ATA tambe ta den su momento pa haci su strategianan, pa e siguiente añanan, pa wak kico mester cambia den su estrategia pa por atende cu e asunto aki di sobreturismo”, Tisa LaSorte, CEO di AHATA, a señala, agregando cu tambe pa atrae e tipo di turismo cu ta aprecia y proteha naturaleza, cu ta un di e puntonan nobo cu a wordo menciona, durante conferencia aki, pa nos bay mas den e mensahe di proteccion.
