Minister di Enseñanza Endy Croes:
ORANJESTAD (AAN) – E conferencia di prensa di gobierno Diaranzon 24 di Augustus aki, tabata na encargo di Minister di Enseñanza y Deporte, señor Endy Croes, kende a enfoca riba e restructuracion di OAA (Openbare Avondleergangen Aruba) of Scol di Ofishi.
E mandatario a duna informacion tocante enseñanza en general, pa asina mantene e conectividad cu pueblo riba desaroyonan aki, y tambe el a referi un poco na deporte. E dignatario a cuminza na elabora tocante OAA (Openbare Avondleergangen Aruba) cu desde 2021 tabata plat, y cu awor nan ta bezig cune pa reanuda OAA na September proximo.
Minister Endy Croes a duna un relato corto tocante e historia di OAA, cu ta e prome scol di tecnico di ofishi na Aruba, cu antes tabata na John F. Kennedy School, unda awo tin e J.F.K Education Center, den e mesun edificio cu a cambia di destino.
E mandatario a splica cu desde aña 1955 ta brindando enseñanza anochi, cu desde 1987 a haya e nomber nobo di “Openbare Avondleergangen Aruba” conoci como OAA, y desde 2009 ta resorta bao di bao di DPS. Croes a señala cu e sa cu tabata tin intentonan pa pone esaki bao di S-EPB, durante e ministerio prome cune, pero e decision final ta cu el a keda resorta bao di DPS.
Pa continua cu OAA, e mandatario a subraya, berdaderamente tin un team duro trahando al respecto. Na cabes tin señor Carlos Martinus, cu no ta desconoci den e mundo di beroeps onderwijs, ken ta atendiendo cu e parti di restructuracion y tambe pa pone OAA, den un bachi completamente nobo.
KICO TA E META DI OAA?
Minister Endy Croes a splica cu e meta primodial ta ofrece curso y opleiding na bienestar y demanda di e mercado laboral, brinda enseñanza practico y dinamico, ofrece programanan personaliza, y enfoca riba experiencia di trabao anterior, y ofrece perspectiva pa futuro na muchanan di 17 aña bay ariba, te na hende grandi.
KEN TUR TA PARTICIPANTE?
Manera e mandatario a splica caba, hobennan di 17 aña bay ariba cu kier studia anochi por aplica pero tambe hendenan grandi cu kier sigui estudio. Tur esnan cu no ta den enseñanza obligatorio por meld tambe na OAA dentro di poco, y esnan cu kier redefini nan mes of ta buscando un trabao, tambe por aplica na OAA pa haya e redefinicion aki pa un of otro trabao.
“OAA lo brinda, for di September proximo, y e deadline ta pa cuminza entre 12 pa 18 di September”, Minister Endy Croes a indica.
