Duna bo opinion riba e vakantierooster di scol
ORANJESTAD (AAN): E concept vakantierooster pa añanan escolar/academico 2025-2026 y 2026-2027 ta den proceso. E instancianan cu structuralmente ta envolvi den e proceso ta Departamento di Enseñansa Aruba (DEA), Dienst Inspectie van het Onderwijs, Sindicato di Maestro di Aruba (SIMAR) y tur directiva di scol, cualnan ta encarga pa representa interes di nan scol(nan).
Durante e proceso sa duna comunidad tambe, principalmente e mayor y e studiantenan, e oportunidad pa duna opinion riba algun aspecto di e vakantierooster. Den pasado a yega di pidi opinion riba apertura di aña escolar (dialuna of diaranson/diahuebs). E aña aki nos ta desea di sa si ta prefera mas dia di vakantie durante temporada di Carnaval of Pasco.
Ta importante pa sa cu un vakantierooster ta wordo formula conforme e “Regeling lengte schooljaar en maximum aantal vakantiedagen” (AB 1988 No. GT13). Aki tin fiha cu e cantidad di dia di vakantie pa e mucha/studiante ta 60 dia pa aña escolar, cual ta inclui dianan di fiesta. E comienso y e final di un aña escolar, como tambe e fechanan di examen ta fluctua hunto cu dianan internacional di fiesta manera Diaranson di Shinishi, Diabierna Santo y Pasco Grandi. E fechanan di examen (eerste y tweede tijdvak) ta wordo stipula pa Ministerie van Onderwijs, Cultuur en Wetenschap na Hulanda. Aruba mester mantene su mes na e fechanan aki.
E cantidad total di 60 dia di vakantie lo no cambia, sinembargo algun caminda tin espacio pa un reparticion diferente di e dianan. Den esaki mester tene mas tanto cuenta posibel cu e mucha/studiante, examen, e trabou di maestro, e organisacion na scol, dianan di ATV general y dianan di fiesta na Aruba.
Poll
Duna bo opinion riba e vakantierooster: 1 siman di vakantie durante temporada di Carnaval (feb/mar) of mas dia durante “kerstvakantie” (dec)?
Por dun abo opinion door di vota den un poll riba nos website: https://www.ea.aw/pages/duna-bo-opinion-riba-e-vakantierooster. E poll lo keda activo te cu diaranson 18 di september 2024.
Riba e paginanan di social media @educationaruba por elabora bo opinion. Unabes ricibi input di tur stakeholders, e proposicion ta bay pa Minister di Enseñansa di Aruba pa aprobacion.
Na momento cu tin e aprobacion di minister, ta publica e vakantierooster oficial y e ATV-dagen pa Onderwijspersoneel riba website ea.aw. Ta premira cu esaki lo ta na final di luna di october proximo.
