Otro siman na Biblioteca
ORANJESTAD (AAN): Diamars 28 di October 2025, di 6:30 pm pa 9:00 pm lo tin un actividad na Biblioteca Nacional Aruba, George Madurostraat 13, Oranjestad cu un encuentro literario- cultural- linguistico cu homenahe dedica na Digna Laclé-Herrera (d.f.m.).
Durante e actividad lo celebra bida y e Centenario, 1925-2025, di Digna Laclé-Herrera.
Digna Laclé-Herrera tabata un persona cu un trayectoria impresionante como maestra y docente di scol, poeta, autor, compositor, politico y hende di tur hende. Ariba tereno social Digna a traha den diferente organisacion di hende muhe y di derecho di mucha.
Digna tabata un persona cu amor grandi pa nos idioma Papiamento: Encuentro – Homenahe – Recordatorio - Celebracion ‘Un Siglo di Recuerdo’, dedica na autor Digna Laclé-Herrera, kende a nace na 1925, lo ta un encuentro Literario, Artistico, Cultural, Creativo, Linguistico y Educativo. Un programa integra y varia cu documental, declamacion, charla cortico, musica y canto. Den cooperacion cu Astrid Britten, Biblioteca Nacional Aruba, Departamento di Cultura Aruba y Mirto Laclé lo presenta un programa multidisciplinario integra cu enfoke riba tres genero literario, esta poesia, prosa y drama.
Como invitado special Sergio Tjie-A-Loi lo duna splicacion y lo presenta un fragmento di un documental dedica na Digna Lalclé-Herrera titula ‘Despues di bo’. Ta un documental produci pa René Maduro.
Mirto Laclé lo duna un introduccion y recorido di e herencia, legado di e obra literario di Digna Laclé-Herrera.
Deleite musical ta den man di Maybelline Arends-Croes cu presentacion di grupo ex-Tutti-Frutti cu cantantenan Hilyanne Croes, Mandy Villasmil y Kiziah Trimon. Cancionnan cu Digna a compone hunto cu Maybelline y mas. E pianista Johnny Scharbaay y banda lo entretene publico cu nan musica y lo acompaña e cantantenan durante nan presentacion. Laga nos celebra y disfruta di un anochi multidisciplinario. Entrada pa e anochi aki ta completamente gratis.
