Di 1914 pa 2022 hende no por a uza progreso cientifico pa su felicidad --- *E armanan a cambia pero e propositonan a keda mescos --- * Di trinchera pa supersonico e costo humano di violencia y guera
ORANJESTAD(AAN)- 28 di Juli 1914. Un fecha cu a marca un siglo di destruccion causa pa guera, cada rato mas efectivo den e destruccion di e ser humano y su bienestar.
Na 1914, Prome Guera mundial a wordo ocasiona dor di e asesinato di e principe heredero di Austria Hungaria dor di Gustave Princip di Bosnia Servia.
Un guera cruel a haya su inicio cu participacion di paisnan rond mundo.
Bida di hende a bira barata den e guera di trinchera, caminda soldatnan tabata sconde pa ataca of defende nan mes contra atke den un matansa total.
E confrontacion a nifica finalmente e caida di Imperio Ruso y entrada di comunismo na un mundo, cu a cambia completamente di aspecto.
A surgi un Europa nobo pero tambe un pandemia mundial, cu por a plama den e accionnan militar.
Miseria, hamber y un falta di sentido di husticia a keda atras na varios pais, mientras na Merca no a tarda pa e mercado di balornan a crash y mundo a cera conoci cu e Gran Depresion cu su destruccion financiero, economico y social mundial.
E miseria humano no a forma un barera pa mas violencia mundial a base di e experencia di Prome Guera Mundial.
Figuranan nobo a surgi a base di manipulacion di personanan den necesidad grandi.
Exactamente un siglo pasa, mundo a mira surgimento di Benito Mussolini y Adolf Hitler, dos dictador cu a uza e situacionnan cu a keda atras di e Prome Guera Mundial y e necesidadnan di hende, pa introduci nan propio dictadura cu lo a conduci na Segundo Guera Mundial.
E pensamento socialista a wordo sembra tanto na Italia como na Alemania, caminda e regreso di Imperialismo a wordo uza pa lanta e pueblo contra e condicionnan cu Prome Guera Mundial a crea y sirbi interes di e despotanan cu a bira lider di Italia y Alemania.
Hitler a papia di introduccion di e tercer imperio na Alemania cu lo tabata heredero di e Imperio Santo Romano y di e Imperio Aleman.
Mussolini a presenta su mes como e dirigente di e Italia nobo, centro di e Imperio Romano.
Nan no a proclama nan mes Imperador, pero a uza socialismo pa avansa y destrui hende den e Segundo Guera Mundial, cu a explota den Oceano Pacifico tambe.
Prome di September Hitler a invadi Polonia, despues cu Mussolini ya a ataca Francia.
E Imperio Japones cu kier a domina Asia, na 1941 a lansa su ofensivo contra Merca y Inglatera y e atake riba Pearl Harbor a anuncia inicio di Guera Mundial den Pacifico, cu lo a termina na 1945 ora pa prome bez den historia e bom atomico lo a rementa.
Na final di guera mundial, mundo a bolbe conoce cambio.
Surgimento di Comunismo rond mundo a bira realidad y a cambio mundo den un campo di bataya, cu awe ta bolbe rementa.
Como Union Sovietico Rusia a bira e gigante mientras den Pacifico e Gueranan di Korea y Vietnam, a sigui exigi morto y confrontacionnan na Africa del Norte nunca a termina.
Yegando fin di Siglo 20 a parce cu e “guera friu” a termina cu final sigur di Union Sovietico, cu prome cu el a stop di existi, a plama comunismo rond mundo y asina su poder militar.
Awe mundo ta biba den e temor di e Tercer Guera Mundial cu realmente a cuminsa pero cu tur hende ta evita pa haya contenido real, debi na e armanan cu mundo a crea pa mundo por sigui destrui su mes.
Hamber, miseria, desesperacion di e ser humano ta e saldo di un Siglo di Guera cada bez cu miho arma cu ta destrui tur trabou y planificacion di e ser humano.
Awe Rusia ta papia di e Imperio Ruso, cu e partido comunista di Vladimir Putin mes a destrui.
Aliansanan nobo ta wordo forma den e lucha pa poder y e destruccion di hende.
Na 1922, mundo azota pa Prome Guera Mundial, pandemia cu Great Depression na caminda, tabata un planeta di sufrimento cu ainda mester a conoce Segundo Guera Mundial.
Na 2022 cortina di hero a bolbe cay na Rusia, cu ta haci uzo di avionnan supersonico pa destrui tur cu ta contra Vladimir Putin, sea cu nan ta Ruso of no Ruso.
Economia mundial ta basha abou na 2022, cu un Pandemia di Covid-19 cu ainda no a pasa pa pasado y un mundo cu guera mundial a stroba transforma progreso cientifico den bienestar humano.
