Ley di Contabilidad ta exigi claridad riba balanza economico y bida social
*Un pais cu mas oferta di trabou cu trahador ta un tesoro pa belasting
*Kico ta strobe Aruba subi entrada real di comercio, trahador y anciano?
ORANJESTAD(AAN)—Aruba ta un estado di derecho. Pues un estado cu ta basa su mes ariba Ley, cu ta dicidi pa e bida di e ciudadano for di momento cu e nace te ora e bira feliz memoria.
Kico ta nifica “Ley social”? Leynan social ta dicidi ariba e nivel di bida di un ciudadano y e asistencia cu e ta ricibi pa e por hiba un bida aceptabel segun e nivel di bida na e pais.
Kico ta un bida aceptabel? Democracia ta papia un palabra cla. Un bida aceptable segun democracia, ta e bida cu tur ciudadano por hiba como ser humano.
Leynan social segun democracia, ta basa ariba e principionan cu ta base di Arubianismo, pues e forma di pensa, di biba, e cultura di e Arubiano.
Crisisnan grandi cu Aruba a conoce atrabez di su historia, ta papia di e forma cu Pueblo di Aruba den e sistema basa ariba principionan Arubano, cu ta exigi pa Arubianonan tene man di otro y hunto confronta tur peso di bida.
E Arubiano a traha duro den tur sector economico, pues sector cu ta crea e entrada necesario pa trabou bira e forma cu wea ta produci cuminda y felicidad reina den Pueblo.
Awe na un forma continuo y manera e Arubiano mes por mira cu su propio wowonan, Aruba mester wordo considera un pais cu un base solido pasobra Aruba como pais for di 2024 tabata hasta capaz pa cubri su gastonan cu su entrada manera e ley mas sagrado pa atende cu placa di Pueblo, ta exigi.
Na 2025 ainda, sinembargo, Aruba no por tuma tur medida cu mester tuma pa percura pa tur Arubiano por hiba un bida comodo a base di e resultadonan di e placa cu Pueblo ta produci como trahador di tur rango den un comercio, cu mester genera placa pa Pueblo y asina pa Gobierno.
Cu na e momentonan aki Aruba conoce un tempo di oro, ta wordo suscribi pa e informacionnan di sector comercial, cu no tin suficiente trahador pa haci tur trabou cu mester haci na Aruba y ta pidi pa por importa mas trahador.
Hulanda cu tabata semper e yudansa financiero directo pa Aruba ora candela di problema kima wea y cuminda na Aruba, ta splica cu e por yuda Aruba sembra su propio cuminda pero cu awor Aruba mes mester por atende su propio asuntonan.
Kico ta asunto di Aruba? E bienestar di cada ciudadano di Aruba ta e punto di salida pa tur accion cu mester wordo tuma.
Un Aruba cu un economia cu hasta mester duna trabou na trahadornan sin trabou na paisnan grandi, sinembargo no tin placa, pa honra necesidadnan serio cu tin na Aruba, manera informacion oficial ta mustra.
Pakico e entrada enorme cu Comercio y Pueblo productor di placa di Aruba ta entrega na caha di Gobierno na forma di belasting, no ta alcansabel pa cubri tur necesidad cu ainda mester wordo cubri na Aruba?
Un pregunta cu sigur Parlamento cu mester tene duro na e Ley di Contabilidad, mester splica Pueblo di Aruba.
Pakico tur e placa cu Aruba durante ultimo añanan a produci, no a y ta permiti pa cubri tur e necesidadnan social di Aruba. Kico ta e gastonan grandi cu Aruba tin y cu ta hustifica cu un pais cu no tin suficiente trahador pa honra e necesidad di economia mester importa trahador, no por cumpli cu su pakete social.
Cu otro palabra, Pueblo di Aruba mester ricibi splicacion di e motibo cu a pesar di tur e placa cu awor comercio y trahadornan di Aruba ta produci, a base di e Ley di Contabilidad, no por honra tur necesidad social di Aruba y realmente comberti Aruba den un paraiso social, cu e no ta!
Kico ta e peso grandi den e balansa di pago di Aruba? Pues kico ta kita for di boca di Pueblo di Aruba tur pan cu e por a come si mira e placa cu Aruba ta produci a base di informacionnan economico cu Gobierno mes ta presenta.
Uno di e cambionan grandi cu Aruba a desea na 2024, tabata den Parlamento cu manera rapportnan oficial a mustra den pasado a permiti Aruba casi hoga den tormenta financiero.
Awe Miembronan di Aruba mester splica pakico un Aruba cu un economia asina grandi cu e mester importa trahadornan di paisnan grandi, no ta capaz pa entrega Pueblo di Aruba, e base social cu produccion economico di e pais ta exigi.
Un generacion nobo di Arubiano a tuma timon. Un generacion di un mundo cu a internacionaliza, ta haci uzo di sistemanan di Inteligencia Artificial pa produci informacion, cu ta sostene e claridad cu democracia ta exigi enfrente Pueblo.
Pakico e Arubiano no por goza di e recuperacin financiero di Aruba cu a wordo alcansa for di 2024? Palabra ta keda na Parlamento cu na nomber di Pueblo tin tur e hermentnan pa presenta e contesta y hasta por uza departamentonan como consehero pa splica Pueblo pa kico no tin placa pa cubri necesidadnan grandi di Pueblo!
Parlamento tin tur informacion a base di Ley. E por contesta!
