For di prome cu cambio di siglo mundo tabata conoci cu atake cybernetico
*Inversion contra ladronicia di informacion mihor negoshi di Siglo 21
*Instancianan oficial mester duna prioridad na secrecia di informacion
ORANJESTAD (AAN) — E arte di haci negoshi ta mes bieu cu hende, cu mester a busca forma pa mantene su mes na bida.
For di momento cu Adam y Eva a dicidi di come un solo appel, nan a hinca hende den e problema serio cu hende mes mester a planta mata di appel pa mira kico e ta come pasobra morto di paraiso a cera.
Hende a sobrevivi te awe na forma sorprendente pa medio di loke ta wordo yama negoshi cu no ta solamente un tienda priva, pero tambe tur persona cu ta ricibi pago pa trabou of producto cu nan ta entrega.
Na e momento cu hende a costumbra cu un servicio of articulo nobo, e ta wordo cambia y esaki ta crea e necesidad pa hende reemplaza loke e tin.
Esaki ta e arte scondi di haci negoshi cu tur hende, sea cu nan mes negoshi of den servicio di compania, ta mantene pa nan por tin entrada cu ta necesario pa sobrebibi gastonan di bida.
Un hende of instancia cu ta uza su cabez, ta bon na haltura cu cosnan por pasa y ta proteha su mes contra loke ta pasa generalmente pero de bez en cuando ta prefera spera te ora problema presenta pa e actua.
DIARIO no awor, pero continuamente durante ultimo temponan, a base di cantidad di problema cu ta presenta nan mes, a bati alarma pa e forma cu sistemanan di computer ta wordo ataca na nivel internacional.
DIARIO a papia di un guera nobo, e guera cybernetico, no solamente riba tereno militar pero den tur tipo di negoshi y instancia.
Historia ta indica con for di prome cu Siglo 20 a bati na porta, ya e peliger di virus a manifesta su mes y hasta e productor di virus a bira popular rond mundo pa e forma cu el a logra penetra den e sistema di otro instancia y causa daño na esaki.
Di e forma aki e sistemanan di seguridad di computer a bira un negoshi mundial agresivo rapidamente. Proteccion di computer a bira mes importante cu e computer mes y den e careda kende lo gana e guera, hopi placa a move di un man pa otro den e creacion di productonan nobo.
Si mira tras den e negoshi mundial di computer, por nota cu no ta e aparatonan di computer so ta costa placa y atencion pero sigur mester tene na consideracion e gastonan enorme di e evolucion di programanan cu tanto pa honra necesidad di esnan cu ta uza computer como defensa di nan sistema di computer, ta wordo presenta.
Negoshi ta sigui lora cu asunto di computer, pero tin instancianan cu mester presta mas atencion cu otro na loke por ta resultado di un atake cibernitico, pues riba e sistema di comunicacion pa medio di computer.
DIARIO a adverti algun luna pasa, cu despues cu Ministerio Publico di Hulanda a wordo afecta pa e atake cibernetico, a wordo dicidi cu no ta atende cu sistemanan peligroso mas den e entrega di informacionnan sumamente confidencial di hende cu pa ley mester wordo proteha.
E pregunta grandi cu ta bini dilanti ta, si nunca mester a haci uzo di computer pa cierto informacion, teniendo cuenta cu e hecho cu probablemente for di momento cu un computer a subi mercado, ya di otro banda den mundo di delincuencia e forma pa horta informacion di e computer ya a wordo inventa.
Aki ta papia di un circulo vicioso, cu mester conoce un fin basa ariba e hecho cu informacionnan secreto mester ta proteha na forma optimal y mester keda secreto loke ta nifica cu ta solamente den casonan extremo, ta tuma riesgo di intercambio.
E sistema di internet ta manera tuberia di awa, cu ta haci posibel pa e liquido plama.
Secrecia di informacion ta haci cu no mester tin tuberia na cierto informacion y sigur no tuberia cu por ta alcansabel pa criminal.
E cantidad di placa cu ta wordo inverti den proteccion di informacion cu ta wordo atende pa medio di computer, ya ta duna indicacion serio di e peliger cu ta existi.
Un pais cu ta basa su mes riba ley, riba tur tereno mester percura pa e cumpli cu Ley loke ta haci cu ningun buraco mester ta habri pa criminal, cu riba tur tereno manera historia ta demostra, tin mentenan super inventivo cu ta nan mihor capacidad como criminal.
Informacion secreto hamas mester pasa ni pa telefon, manera ta keda proba pero mester wordo trata cu cautela grandi pasobra ley ta exigi respet pa informacion secreto di hende cu solamente na interes general por wordo kibra.
For di momento cu algun siman pasa na Hulanda Ministerio Publico a bati alarma pa peliger pa informacion confidencial, DIARIO a bati alarma na Aruba, cu awor cu urgencia mester adapta tur transmision di informacion na sistemanan sigur cu no por permiti cu integridad di hende, cu ta central den comunidad, ta wordo kibra!
Gobierno mescos cu tur instancia na mundo, mester tene cuenta cu gastonan di seguridad cu lo sigui presenta nan mes den sistemanan di comunicacion, ya cu e forma pa kibra seguridad aparentemente ta nace na mes momento cu e sistema di comunicacion ta wordo introduci y asina ta produci un negoshi adicional, manera historia a demostra.
