JACKSON: Un cayman di e tamaño di un SUV chikito a wordo gara y mata na Mississippi na Merca, y e ta asina grandi cu segun autoridadnan, el a kibra un record estatal.
E asina yama Mississippi Departament of Wildlife, Fisheries and Parks a bisa cu cuatro jaagdo a captura e cayman macho aki Diasabra durante di e season habri pa jaag riba cayman.
“E tabata midi casi 4 1/2 meter largo, cu un circunferencia na su stoma di 66 duim, y un circunferencia na e rabo di 46,5 duim,” ta loke e oficialnan di e Departamento a indica. E cayman a pisa un total di 364 kilo.
E ultimo cayman cu tabatin e record a wordo gara na 2017, y tabata midi 4,28 meter, tabata pisa 347 kilo. E cayman di e weekend aki ta mas largo cu e hanchura di e tres jaagdo cu tabata para banda di otro.
“Esaki ta un dinosauro di berdad,” un persona a skirbi riba social media. “Sigur e captura aki tabata un momento increible.”
Estado di Mississippi a autoriza un temporada publico di jaagmento deportivo riba cayman desde 2005. Awendia e season ta dura apenas 10 dia, y ta permiti jaagmento cu e permisonan necesario, cu por captura dos cayman di mas di 4 pia largo, y solamente uno di nan por midi mas di 7 pia. E season di 2023 a cuminza Diabierna 25 di Augustus.
E reptilnan aki, cu segun Mississippi, “no ta naturalmente agresivo pa cu hendenan,” no por wordo gara, retira, ni mata sin un permiso di e Departamento.
