Mientras Putin ta reuni cu aliadonan na otro banda di mundo --- *Preocupacion serio pa region y oponentenan di regimennan --- *Un conflicto mundial serio ta den formacion na 2022
ORANJESTAD(AAN)—Gran Colombia tabata e nomber di e teritorionan Latino Americano cu mester a forma un pais y union fuerte.
Awe comunismo ta trata yega na un Gran Colombia nobo?
Esaki ta preocupacion di informantenan cu ta inclui personanan procedente di paisnan cu tendencianan socialista of caminda dirigentenan comunista a haci nan entrada.
Den silencio e lucha comunista pa haya gara na America Latino a continua mientras Gobiernonan.
Debenan nacional y inflacion serio a sigui afecta cantidad di pais Latino Americano caminda e Pueblo cu menos entrada ta kere den e promesanan di aliadonan di comunismo cu ta sigui penetra.
Informantenan importante di DIARIO a mustra riba e forsa creciente den politica Latino Americano di socialismo, cu a yega hopi cerca di Aruba.
Kico esaki lo haci pa pueblonan?
Segun informantenan na e paisnan caminda comunismo ta avansa, ta existi temor cerca contricantenan di e politiconan na mando dilanti costa di Aruba tambe.
Informacionnan ta indica con Colombia y Venezuela ta acerca otro despues cu ambos pais por conta cu sostenedor di socialismo.
E partidonan socialista lo ta concentra nan atencion riba gruponan di indigenonan cu a keda atras den e desaroyo di paisnan.
E sexo femenino cu segun cultura di hopi pais no a wordo acepta como igual, awor tambe ta mas apto pa uni su mes na e grupo creciente cu ta sostene socialismo, cu ta ofrece promesanan importante.
Kico e resultado lo ta pa Aruba?
Informantenan ta tene na cuenta cu personanan cu no ta di acuerdo cu e avance di Rusia na Latino America y ta conoci cu e gobernacionnan di teror manera di Venezuela, lo busca refugio na otro lugar.
Expertonan ta papia di desaroyonan mundial serio cu ta perde atencion mientras Rusia a dirigi bista di mundo riba Guera di Ukraine despues di a plama su doctrina comunista, cu awe ta haci Ukraine su victima.
Si resumi informacionnan di expertonan, Aruba mester keda alerto pa e cambionan regional cu por haci cu e cantidad di refugiadonan den e region ta aumenta en busca di un salida pa no cay den gara di dictadura, cu ta marca di comunismo.
