Sigur ora ta trata di hospital cu hopi pregunta serio sin contesta --- *Director Financiero y Algemene Rekenkamer ta controla placa --- *Libertad moral pa por actua sin reserva enfrente cualkier persona
ORANJESTAD(AAN)—Mas halto e funcion di un persona, mas e mester cuida su bon reputacion y asina haci cu ningun hende por cuestiona su nivel moral of uza un fayo den su bida profesional of personal.
Ora ta papia di un dirigente, ta papia di un persona liber, cu no mester sconde nada pa ningun hende y no por wordo uza dor di ningun hende pasobra tin mancha na su nomber.
Atrobe nos ta bolbe na loke tabata central den Corte di Husticia di Aruba durante eleccion 2021, ora Corte di Husticia tabata cera tur porta cu por a conduci na corupcion.
Na diferente ocasion nos a trece dilanti cu mester sigui presta atencion na loke Hueznan a trece dilanti, ora nan a mustra con un hende por wordo manipula na un of otro forma loke directamente tin resultado pa e pais.
Corupcion, acto den cual por ehempel un hende ta haya placa pa e haci algo, ta peligroso pasobra e ta tira lodo riba democracia, riba e base di Aruba como pais democratico y ta destrui e base sano di e pais.
Corupcion y manipulacion ta nace ora un persona tin informacion di un persona cu tin influencia importante y ta uza esaki como arma pa silencia e persona of pa stroba e bon ehecucion di trabou.
Aruba a conoce e caso di e Vice Presidente di Algemene Rekenkamer Aruba, cu mester a entrega su retiro a base di accion di miembronan di Parlamento.
Accion cu DIARIO a sostene pasobra ya e no tin e base intachabel pa haci su trabou. Su imagen cu ta imagen di Aruba, a wordo mancha y el a duna prueba di un debilidad cu un persona por uza pa actua contra interes di Aruba.
E Vice Presidente di Algemene Rekenkamer Aruba a wordo reemplasa y awor un persona cu ta coresponde directamente na su imagen, no ta haya su retiro pero por keda traha na Hosopital di Aruba, cu ta exigi hende cu por para fuerte y cu reputacion intachabel.
E Director Financiero di Hospital tin e mes tarea cu e Vice Presidentr di Algemene Rekenkamer.
E mester por huzga imparcial sigur ora ta trata aki di placa di un hospital, cu ta wordo cuestiona hustamente pa un calamidad financiero cu ta loke e hospital ta y awe te den Corte dos instancia di hospital ta confronta otro.
Na e momento aki no por tin ningun duda riba e base di moral di e director financiero di Hospital.
Ta berdad cu cantidad di hende ta dal betro y ta participa na trafico aunke esaki ta contra ley. Esaki ta motibo cu Polis ta actua den un trafico cu por pone fin na bida di hende.
Ta pa evita cu personanan den funcion importante por haci esaki, un tempo tabata exigi pa tur hende den cierto funcion tin chofer pa nan por asisti na un receptie y gosa di un drink, sin preocupa nan mes cu nan mester stuur.
E Director financiero di Hospital no a tene su mes na regla. El a kibra un ley, cu ta proteha bida humano cu ta na peliger na momento cu persona bebe alcohol y maneha un vehiculo.
El a comete un eror. Punto. Un eror cu mester a haci cu e ta entrega su retiro pasobra ya e no por duna prueba di un moral, cu ta tene completamente na ley loke ta sumamente importante ora hende ta traha cu placa of ta e persona cu decision final.
Hecho ta, cu awor Hospital tin un Director Financiero cu cualkier persona por trata na manda cera su boca, pasobra el a wordo detene dor di Polis.
Hospital, cu ta un desaster financiero y organisatorio tin un director financiero, cu no a manda pa Pueblo e mensahe, cu moral ta bini na prome lugar. Esaki ta nifica cu tin e posibilidad cu hende por trata di uza su persona pa haci loke ley no ta permiti.
Hospital tin e deber di actua y mas ainda, introduci un regla mucho mas amplio pa consumo di alcohol tambe.
Democracia ta nifica: “ley pa uno y ley pa tur” sigur den hospital, cu mester atende cu bida di hende.
Mescos cu cualkier trahador cu wordo deteni ta keda sin trabou, Hospital mester cumpli cu regla y mester exigi su director financiero entrega su retiro. Punto.
