Parlamentario Dangui Oduber (MEP):
- Pesey pueblo ta hopi preocupa
- Desconfiansa ta hunga un rol importante
ORANJESTAD (AAN): Pueblo di Aruba ta sumamente preocupa cu e formacion di e gobierno nobo cu lo mester bay sinta. Ya caba a pasa mas di 100 dia y ainda no tin claridad y ningun indicacion ki dia e gobierno nobo lo bay sinta. Pueblo no solamente ta preocupa sino harta y fada pa e infantilismo cu ta existi den e formacion di e gobierno nobo.
Desconfiansa den otro pero basta nan ta na poder: E formacion a cuminsa malo, nunca den historia ni na Aruba ni na Hulanda y den reino ora di forma un coalicion tin 2 formador. Aruba e bira e unico pais den reino cu na momento di forma un coalicion e auto tin 2 driver. E motibo pakico e auto tin 2 driver ta pa e desconfiansa cu ambos lider tanto Gerlien Croes como Mike Eman tin den otro. Ningun momento tabata tin un synergia y cada entrevista e ta mas cu obvio cu nan no ta confia otro pero pa nan e ta mas importante pa no laga MEP den gobierno.
E otro aspecto pakico formacion a tarda asina tanto ta pasobra ta bisto cu interes personal ta bay riba interes general. Con por ta posibel cu a tarda mas cu 2 luna pa yega na un acuerdo di gobernacion y reparticion di carteranan.
Awe formadornan kier culpa e proceso riguroso di screening pero nan mes a vota pa e ley aki y nan mes tabata sa cu e lo tuma mas tempo cu e screening anterior y asina mes nan mes NO por a yega na otro. A tuma mas cu 2 luna di tempo pa por a yega na otro y awor nos ta compronde ainda tin rancamento di ciboyo kende ta e candidato di AVP pa bira GevMin na Hulanda pasobra e candidato aki mester conta cu aprobacion di e di dos driver, esta sra Croes.
Tabata tin of no tabata tin partijraad di Futuro: Nos a mira tiramento di palabra di activistanan di AVP den direccion di sra Croes y te hasta por conclui cu el a bira basta mahos caminda insultonan basta pisa a cay! Nos a mira con lider di Futuro sra Croes ta bisa cu a tene partijraad y cu ta partijraad a dicidi cu Sra Desiree Croes NO por bira minister.
Di otro banda miembro di Partido sra Muzanin Wever ta declara cu NO tabata tin partijraad, of en todo caso e no tabata invita, y cu e NO sa mes cu sra Desiree Croes lo ta un candidato. Un gañamento sin fin y di e forma aki faltando respet pa pueblo, pa e proceso di formacion como tambe careciendo di sinceridad. Si na comienso caba ta cuminsa gaña y manipula pueblo ta kico ta spera nos mañan?
Nos ta bay tin of no ta bay tin Gobierno: Loke ta mas remarcabel awor ta e hecho cu tin candidato pa bira minister NO a pasa e screening. Consecuentemente e proceso lo bay tarda aun mas pasobra e candidato lo mester wordo reemplasa pa un otro candidato. Moral di e henter e formacion aki ta cu e formadornan a demostra incapacidad pa yega na otro, mas di 100 dia a pasa caba y e desconfiansa cu tin no ta duna un perspectiva positivo, no tin synergia entre e dos drivernan y candidatonan NO ta pasando e screening.
Tur esaki ta pone cu pueblo kier un eleccion nobo pa asina papia cla kende nan kier mira den gobierno. E formadornan a haya e oportunidad y nan a demostra cu nan NO por!
