ORANJESTAD (AAN): Biblioteca na Playa ta presenta un seleccion di poema na Papiamento riba su bentananan.
A cuminsa e exhibicion aki cu un seleccion di poeta clasico, 5 aña pasa. A amplia e exposicion awor cu un seleccion di poema di poetanan contemporaneo. Y tambe poema pa mucha.
E presentacion di poemanan ta di poetanan local; Belen Kock-Marchena, Denis Henriquez, Frenky Geerman, Frida Winklaar Domacasse, Gina Henriquez, Joe J. L. Fortin, Lily Clarisa, Luciano Milliard, Olga Buckley, Pancho Geerman, Reginald de Palm, Rosabelle Illes y Yakari Gabriel. Y ademas 5 poema pa mucha di Robert Reeberg, Desiree Correa, Mili Arends, Mercedes Petrochi y Liliana Erasmus.
Cinco aña pasa a cuminsa cu 11 obra di poetanan clasico, strofanan di poema di Hubert Booi, Ernesto Rosenstand, Federico Oduber, Nydia Ecury, Mario Dijkhoff, Nena Bennett y Nicolas Piña Lampe. Strofanan di cancion di Padu Lampe, Hildward Croes, Ramon Krozendijk y Bernadina Growell-Kock. Biblioteca ta presenta e poemanan riba glas y porta pa capta atencion di publico y duna atencion y honor na nos poetanan local. Nan ta poemanan y fragmentonan impactante pa bishitante por lesa, conoce y disfruta di dje. Asina, hopi mas bishitante ta haya un impresion di expresionnan literario di yiunan di tera y kizas ta keda inspira pa lesa e obranan completo.
Tur publicacion di poesia ta forma parti di e coleccion di Biblioteca Nacional Aruba. E edificio di biblioteca a keda renova aña pasa y Mural artist Robby Solognier a traha riba un bunita mural.
Combina cu e exhibicion di poema esaki ta embeyece e edificio. E proyecto aki ta realisa den cuadro di e celebracion ’75 aña di trabou di biblioteca na Aruba.
Link: https://www.bibliotecanacional.aw/pages/homenahe-na-autor-y-compositor/
