Segun DEA:
ORANJESTAD (AAN): Tin algun reto cu algun studiante cu ta bay studia afo ta pasa aden y esun di mas grandi ta cu nunca nan a biaha y bay biba afo nan so y tambe falta di dominio di idioma Hulandes.
Sharine Croes-Dubero di Departamento di Enseñansa a indica cu tin studiantenan cu nunca a yega di subi un avion of nunca tabata un tempo largo for di nan cas. E reto ey di ta nan so ta algo cu Departamento d Enseñansa ta mira hopi bao di e studiantenan.
Locual DEA ta recomenda ta pa "no cera bo mes y pa keda den contacto cu e famia regularmente. Pero dado momento si bo ta sinti cu algo no ta bon, tuma contacto cu e mentor, cu un amigo di bo, cu bo famia, no keda bo so", Croes-Dubero a expresa.
A enfatisa cu esey ta un di e retonan mas grandi y hulandes. No ta tur mucha nan hulandes ta bon. Sinembargo ultimamente hopi estudio ta na ingles y esey ta algo cu ta yuda bastante.
"Pero toch, mi ta kere cu nos muchanan por. Nan mester kere den nan mes pasobra bo a haal un VWO, bo a haal un HAVO. Bo a yega asina leu, kiermen, nan tin e capacidad. Kiermen, bo por", a remarca.
