Awo tin bruela y alumno y tambe docente ta hay'e:
ORANJESTAD (AAN)— Anuesca Baly directora di SKOA, a menciona, den un entrevista, cu SKOA ta purba mantene e klasnan na 25 alumno, loke awendia tambe ta hopi, pasobra e muchanan di awendia ta diferente na esnan di añanan atras.
E ta scucha algun mayor bisa cu “tempo di mi tempo nos tabata 30 of 40 mucha den klas”, pero awendia e muchanan ta otro tipo di mucha y caminda cu SKOA ta ubica, tur alumno por aplica.
Tocante loke Instituto Pedagogico Arubano “IPA” a indica, cu tin un scarcedad grandi di maestro, y cu nan a cuminza cu extra-lesnan specialmente pa alumnonan di scolnan basico, den e entrevista aki a haci e pregunta na señora Baly a expresa cu semper tin falta di docente. Esey ta un di e motibonan pa cual SKOA ta cuminza cu aplicacion hopi trempan, pasobra tur cos ta un ciclo.
“Bo ta cuminza cu aplicacion, despues di esaki e afdeling di PZ ta sinta cu cabesantenan pa wak cual docentenan ta keda na scol, cual docentenan ta bay, si mester mas docente nos ta pone aviso den corant, pa haya mas docente. Aworaki tin docente na tur scol pero locual no tin ta reemplazante. Por ehemplo den temporada di covid, hopi docente tabata malo y no tabata tin reemplazante; aworaki tin andanza di bruela. Muchanan ta haye pero e docentenan tambe ta haya bruela, anto no tin hende pa reemplaza”, Anuesca Baly a señala.
El a agrega cu e maneho di algun aña atras, tabata cu no por emplea pensionado te na un cierto edad, y si pensionado ta wordo tuma nan ta wordo paga otro. Y claro cu un pensionado ta bisa cu e no ta bay traha pa menos salario di loke e ta haya ora e tabata no pensionado.
Esaki ta un di e retonan cu SKOA ta enfrenta diariamente, y no ta SKOA so pero tur fundacion y instancianan cu ta duna educacion, directora Anuesca Baly a indica.
