Ora e Hogar No Ta (Sinti) Sigur Mas!
ORANJESTAD (AAN): Un mama adulto mayor ta sinta trankilamente den su sofa, cu lomba un tiki dobla, tapando asina slanan blauw na su brasa causa pa maltrato door di su yiu muher, su dunado di cuido.
Un pensionado ta sinta den scuridad, cu hamber pasobra ya ta varios siman cu a corta su coriente, pasobra e NO por paga su factura di coriente.
Su sobrino, su representante autorisa, ta pluma su cuenta di banco.
Un bishitante di un cas di cuido ta ripara cu un cuadro cu un Machi tabata stima asina tanto como recuerdo di su defunto casa, a disparce di su muraya. Ora a puntra e Machi kico a pasa cu e cuadro?, e Machi a sacudi su cabes y cu tristesa den su bos a contesta:”Mi yiu homber ta exigi su parti di herencia awo cu mi ta na bida”. Mi tabatin miedo pa e no rabia si mi nenguele…… E a bay cu e cuadro y a bendele. Mescos tambe e a haci cu un par di renchi di orea di balor emocional.
Abuso di un grandi ta algo mahos, dañino y ta sosode mas cu nos kier pensa cu esnan cu ta mas vulnerabel den comunidad.
Analisando e realidad di abuso di nos grandinan, abuso di adulto mayor ta un problema cu No ta haya e atencion cu e merece.
Bo tabata sa cu maltrato/abuso di adulto mayor ta aumenta e riesgo di mortalidad cu un 40%? Segun diferente estudio a ser calcula cu 1 di cada 10 adulto mayor ta experiencia algun tipo di abuso y cu mayoria di e casonan aki ta tuma luga rond y den e hogar mes. Desafortunadamente, mucho hopi caso NO ta wordo denuncia pa miedo, berguensa of pa falta di conocemento.
E estadistica aki ta enfatisa e necesidad urgente pa accion y intervencion. E prevalencia y e impacto di abuso contra adulto mayor ta algo cu nos tur mester ta preocupa p’e. Esaki pasobra e clase di abusonan aki por tin consecuencianan tanto físicamente como emocionalmente, lagando efectonan grave y duradero atras den bienestar y calidad di bida di un hende. Consecuentemente ta destrui su confiansa, disminui su auto-estima y aumenta aislamento social di e adulto mayor.
Fundacion Alzheimer Aruba ta para pa concientisacion y prevencion di Abuso contra Adulto Mayor.
E contenido di e seminario di diasabra 22 di Juni, na Sanicolas, ta wordo anuncia durante dianan nos dilanti den medionan di comunicación.
