Mas di 6.4 miyon hende a mira America’s Got Talent
ORANJESTAD (AAN): E pida 6 minuut di e audicion di e grupo RCC Aruba a haci Diamars anochi na America’s Got Talent riba NBC Network, a wordo mira e anochi ey en vivo door di 6.46 miyon televidente rond di Merca!
Tanto e time-slot di 8:00 pm, y tambe esun di 9:00 pm den Primetime TV na Merca, a wordo ‘gana’ door di NBC. Mas hende tabata wak e show di America’s Got Talent compara cu tur otro canal.
NBC a gana e rating di Diamars anochi 26 di Juli 2022.
Esaki alavez nifica, cu e nomber di ‘Aruba’ a haya un promocion miyonario completamente gratis cu ta algo valioso pa e isla. Esey ta sin conta cuanto miyon mas a mira e videonan cu a plama riba Social Media, tanto riba YouTube y Facebook.
E productornan di e show a yama e presentacion di e grupo local como “a knockout audition”.
E grupo Rhythm Circus Company Aruba (RCC Aruba) ta consisti di bailarin y acrobatnan di Colombia y Cuba, y desde 20 aña pasa a haci di Aruba nan cas.
Aña pasa e grupo di artistanan aki a participa na un competencia internacional di Circo ‘Budapest Circus Festival’ na Hungria, representando Pais Aruba. RCC Aruba a gana e tercer premio y un premio special. Esaki ta un premio cu ta worde otorga pa e grupo cu a haya mas aceptacion di e publico. E participacion na e Festival Internacional aki a pone cu RCC Aruba a haya hopi atencion internacional y tambe contratonan na Circonan di renombre internacional.
E producernan di America’s Got Talent di NBC-TV na Merca tambe a keda impresiona cu e presentacion di RCC Aruba y a invita e Grupo di artista pa presenta den e show Mericano.
Balor pa Aruba: Esaki a socede Diamars anochi den primetime na Merca, y el a bira un di e acto bombacional di e anochi, y den un otro articulo awe den DIARIO por lesa mas di esey.
E presentacion di RCC riba escenario, cu e nomber “Aruba” masha grandi mes traha den grafitti riba nan bench poni riba stage, a dura 6 minuut.
E costo pa transmiti 30 seconde di propaganda na un network nacional di TV na Merca, costa alrededor di 115.000 Dollar. Esey nifica, cu un propaganda di 6 minuut largo lo a costa 1.38 miyon Dollar pa bay den aire.
Aruba a haya tur e 6 minuut aki gratis! Cu tanto e huradonan, e anfitrion, y e participantenan mencionando ‘Aruba’ cada rato.
Sigur un propaganda cu tur hende den Mundo di Turismo, den Gobierno, y den pueblo mester ta orguyoso di dje. Si acaso abo ta unico cu no ta di acuerdo, anto bo tin di bay cuestiona di berdad ta ki tipo di patriotismo bo tin den bo alma.
Pagina 16 tin mas informacion di e evento aki.
