ORANJESTAD (AAN): Esaki sin duda alguno ta un grupo cu stima Aruba inmensamente!
Y atrobe e dianan aki nan ta riba nan isla preferi, ta gozando di su beach, solo, y di bida nocturno.
Ta trata aki di e grupo cu nan mes ta yama ‘Rhode Island’s Fun Seekers”. Nan a caba di yega recien, pa goza di un siman largo di diberticion, y relaha nan curpa na nan resort faborito, cu ta Windcreek Renaissance Marina.
Nan filosofia ta cu bo tin di goza di bo vacacion na un forma inolvidable, divertido, rondona pa amigonan cu tey pa sostene cada uno, y yuda e grupo goza di bida. Pesey mes, e grupo aki di Funseekers a cuminsa di aña 2000. Pues aworaki nan tin 22 aña ta viahando y bishitando Aruba.
A ser splica na DIARIO, cu nan bishita pa Aruba ta socede 1 biaha pa aña, y e ta un siman yena cu momentonan cu lo keda memorable pa nan. Nan tin hasta un website pa comunica cu otro y documenta nan viahe pa Aruba, y esey ta www.funseekertrips.com y nan a indica cu nan lo sigui haci mas viahe pa nan isla faborito.
