Den Memoria di Francisco ‘Tico’ Kock:
ORANJESTAD (AAN): Cu un sentido di tristesa pero alabes cu gratitud profundo, e ekipo di Aruba Tourism Authority (A.T.A.) ta uni su mes na e sentimento di e sector turistico y e comunidad di Aruba cu e fayecimento di Francisco ‘Tico’ Kock. Tico tabata un musico talentoso y un persona sumamente keri, cu a dedica mas di tres decada pa alegra bishitantenan riba nos isla.
Conoci pa su felicidad contagioso su disposicion pa yuda, Tico tabata un berdadero embahador di hospitalidad Arubiano. Loke a cuminsa como un pasion banda di su trabou den hotel, a evoluciona den un compromiso full-time pa trece alegria door di su steelpan na nos bishitantenan. Durante di e añanan, miles y miles di nos bishitantenan por a gosa di Tico su musica na varios sitio rond di nos isla, sea ta na nan yegada na aeropuerto, na waf, na hotelnan of na restaurantnan.
A.T.A. semper por a conta cu colaboracion y cooperacion excepcional di Tico, kende hopi biaha tabata brinda entretenimento na nos bishitantenan, sin spera nada bek a cambio. Su talento tabata incomparable. Tico semper a mantene su mes na altura di e ultimo tendencianan musical y semper tabata añadi e ultimo cancionnan na su repertorio riba steelpan, cu tabata wordo aprecia pa nos bishitantenan. Tico su dedicacion na puntualidad y servicio excelente a haci dje un ehemplo briyante di e spirito Arubiano.
Tico tabata un hende di tur hende y un shon di hende. Pa A.T.A. tabata un placer y privilegio pa conoce y traha cu Tico. Di curason, A.T.A. ta extende palabranan di condolencia y forsa na Tico su famia, amistadnan, e sector turistico y tur persona cu tabata afortuna pa conoce Tico.
Cu e legado di Tico, yena cu devocion y su pasion artistico, continua na inspira nos tur. Nos mas sincero condolencia na esposa, Prisca Kock, y yiu hombernan, Ranson y Rygel, durante e momento dificil aki. Nos ta spera cu nan por haña consuelo den e sentimento di orguyo pa e persona extraordinario cu Tico tabata. Nos pensamento ta bai na famia y amigonan di Tico cu perdida di un persona tan admira.
