No di awo di añanan caba:
ORANJESTAD (AAN) – Riba tereno di infrastructura tin hopi pa haci na Aruba, specialmente den barionan cu ta hopi bandona di man di gobiernonan, y cu ni cu e ciudadanonan ta keha den prensa, a acudi na DOW, y incluso na e minister cu ta na turno, den transcurso di añanan nada ta wordo haci.
Un bario ubica patras di unda Wema Ponton tabata ubica (ainda tin un borchi grandi na entrada di e bario), nada, net net nada a wordo haci alomenos den e ultimonan diez pa diescinco aña.
Lo ta posibel cu Minister Rene Herde por presta un tiki atencion na esaki? Lo por ta cu e por pidi DOW bay tira un bista? Mas cu un aña pasa un habitante di e vecindario a papia cu hende di DOW, y un a trahado a bin y enberdad a wak con malo e situacion di e caretera na, y a priminti di comenta na su hefenan, y purba haci algo, pero te dia di awe nada mas a sosode.
Ta trata di e segmento di Ponton cu ta cuminza na e borchi di Wema drenta man drechi (biniendo di e rotonde Watty Vos Blv) of man robes (biniendo di e rotonde di Tanki Flip) bay straight riba e caminda cu ta sali na Aruba Balm, haciendo un stop na Ponton 81.
Mas of menos tres cuadra despues di e borchi cu Wema a laga atras, tin un tereno bashi, yena cu yerba y sushedad, unda tin un pida caya (si por yame asina), masha estrecho mes pa e peaton cana. Chauffeurnan di auto ta core masha duro eynan, y cada bez e peaton (mucha di scol entre nan) ta core peligro di wordo gedal pa un auto.
Na final di e tereno tin un caminda di santo y piedra chikito unda tame e peaton cu ta na pia tin cu cana, hinca nan zapato den tera pa yega nan cas cu dificultad y tin biaha cu golpi pasobra nan a cay eybanda. E ta un caminda hopi transita pa auto cu ta lanta demasiado stof, cu te paden di cas ta drenta. No por biba cu benta of porta habri, pero tin cu guli calor debi na e situacion di stof aki.
Enberdad, lo ta cu Minister Rene Herde por ta un tiki curioso pa wak e situacion, bisti e zapato di e habitantenan aki un rato, y haci algo? Toch e vecindario aki tambe ta paga belasting cu ta entre otro, pa drecha e infrastructura, of no t’asina?
