Minister Geoffrey Wever:
ORANJESTAD (AAN): Minister di Finansa, Asunto Economico y Sector Primario, Geoffrey Wever ta haci un yamada na tur compania interesa, pa no laga e oportunidad pasa pa participa den e destaho publico pa cuatro contrato di servicio na Departamento di Agricultura, Cria y Pesca (DLVV) “Santa Rosa”. E fecha final pa entrega oferta ta diamars 18 di augustus 2026 pa 10:00 di mainta, y Minister Wever ta encurasha companianan cu tin e experiencia y capacidad necesario pa entrega nan oferta na tempo.
E cuatro contratonan ta importante pa Santa Rosa por cumpli cu su capacidad di trabou y sigui brinda e servicionan cu agricultornan, criadonan di bestia y otro productornan di Sector Primario ta depende riba dje. Alabes, parti di e trabounan ta destina pa mantencion y mehoracion di e facilidadnan di Santa Rosa mes.
Minister Geoffrey Wever ta encurasha especialmente empresanan cu ta activo den e diferente areanan di trabou pa studia e destaho y mira unda nan por participa.
“E oportunidad ta habri y nos kier mira companianan participa. Si bo compania tin e experiencia, personal y ekipo pa haci un di e trabounan aki, no laga e fecha pasa. Participa y presenta bo miho oferta,” Minister Wever a indica.
E destaho ta consisti di cuatro diferente tipo di trabou. E prome contrato ta pa mantencion y infrastructura, incluyendo trabou di edificio, plomeria, electricidad basico, welding, irigacion y otro mantencion. E di dos ta pa cuido di bestianan, incluyendo alimentacion, duna awa y limpiesa di stal. E di tres ta pa trabou cu ekipo pisa y sosten agricola, manera prepara tera, excavacion, transporte di awa, mantencion di dam y otro trabou riba tereno. E di cuatro ta pa cultivo y produccion agricola, incluyendo preparacion di tera, control di plaga, cosecha y otro trabounan relaciona cu produccion.
Companianan no mester participa den tur cuatro contrato. Nan por entrega oferta pa un solo contrato, varios contrato of tur cuatro, dependiendo di nan experiencia y capacidad. Esaki ta habri e oportunidad pa diferente tipo di empresa participa, incluyendo companianan cu ta specialisa den solamente un area di trabou.
E contratistanan cu eventualmente sali ganador lo yuda Santa Rosa tanto cu trabounan na su propio tereno como tambe unda e servicionan cu Santa Rosa ta brinda na su clientenan. Por ehempel, un criado di bestia por ricibi yudansa pa drecha of weld un cura cu a kibra, pa limpia un stal of pa otro trabou necesario. Un agricultor por ricibi yudansa cu preparacion di tera, transporte di awa of uso di ekipo pisa. E ploegnan aki lo yuda Santa Rosa tin e capacidad necesario pa atende e tipo di peticionnan aki.
Un punto importante ta cu hopi di e servicionan cu Santa Rosa ta brinda na agricultornan y criadonan di bestia ta subsidia door di Gobierno. Esaki ta haci posibel pa productor local haci uzo di cierto servicionan na un prijs mas accesibel. P'esey, fortalece e capacidad di Santa Rosa ta beneficia directamente e hendenan cu ta traha diariamente den agricultura y cria di bestia.
“Nos kier pa Santa Rosa por yuda mas agricultor y mas criado di bestia. Esey ta e meta. Gobierno ta sigui duna sosten pa mantene e servicionan accesibel, pero Santa Rosa tambe mester tin suficiente capacidad pa por haci e trabou. E cuatro contratonan aki lo yuda nos logra precisamente esey,” Minister Wever a subraya.
E contratonan lo tin un duracion di 36 luna y e trabounan lo wordo coordina y evalua regularmente pa sigura cu e servicio ta cumpli cu e calidad cu Santa Rosa y su clientenan mester.
Ministerio ta pidi tur compania interesa pa no warda te ultimo momento. E documento completo cu tur condicionnan di participacion ta disponibel via https://bit.ly/4piVtco. E ofertanan mester wordo entrega no mas laat cu diamars 18 di augustus 2026 pa 10:00 di mainta na oficina di Santa Rosa, Piedra Plat 114-A.
Cu e destaho aki, Gobierno ta sigui fortalece Santa Rosa pa e por brinda mas y miho servicio na e hendenan cu ta produci localmente. E oportunidad pa companianan participa ainda ta habri, pero e fecha final ta acercando.
