A habri un ‘Request for Proposal’ internacional
ORANJESTAD (AAN): Ta parce cu e sker pa corta tur instalacion di refineria na San Nicolas y tambe di tankinan na Aruba a stop un biaha mas. Esey a sali na cla, cora cu Refineria di Aruba a core pone riba mesa, e disponibilidad di bay lease 17 tanki pa almacena combustibel. Specialmente e tankinan cu tin na Mondi Lora na Zeewijk.
Refineria di Aruba (RdA) a habri oficialmente un oferta internacional pa ricibi ‘Request for Proposal’ (conoci como RFP) pa por lease e tankinan na Aruba.
Desde Januari pa awor, e interes pa busca tanki den regio pa warda crudo y otro producto di petroleo ta hopi grandi, specialmente pa almacena e heavy crude oil di Venezuela.
Awor e iniciativa aki ta parti di RdA su orientacion strategico pa revitalisa e infrastructura di Aruba su energia.
E terminal ta ofrece un capacidad significante di 10.7 miyon bari (MMBBL) cubri pa 17 tanki como deposito, complimenta dor di dos lugar pa dok den awa profundo (RB-1 y RB-2) capabel pa maneha carga grandi di crudo (ULCC).
E Oportunidad pa bid (RFP-RDA-2026-001) ta presenta dos opcion distinto pa inverti:
(*) Opcion 1: Lease di e tankinan existente y e dos lugarnan pa dok den awa profundo (TT-Asset-1).
(*) Opcion 2: Lease di e terminal actual mas un expansion di e tereno di aproximadamente 118,978 m2 (TT-Asset-2) pa futuro desaroyo di transbordo.
Impacto economico y cumplimento: "E actividadnan na e area di e tankinan mester por tin un
contribucion significativo pa e economia di Aruba y e mercado laboral”, di acuerdo cu gerencia
di RdA.
Proponentenan ta rekeri pa cumpli cu regulacion local, sancion di comercio internacional, y e miho practica di e industria pa medio ambiente, salud y seguridad (EHS). Periodo y registracion: Interesadonan mester registra nan interes atraves di un email pa e Notario apunta. Tambe ta exigi pa tur esnan interesa mester manda un comprobante di pago di e registro.
Informacion detaya y documentonan tecnico lo wordo comparti una bes cu ricibi e pago di registracion. E Notario apunta lo tuma contacto pa duna mas informacion y tambe lo duna acceso na e documentonan oficial di e RFP.
Ultimo dia cu interesadonan por registra ta 19 di Mei 2026 pa 5'or di atardi, ora di Aruba. E potretnan pa cortesia di Refineria di Aruba.
