Acto cu a socede na November 2021
ORANJESTAD (AAN): Despues cu e informe a circula na Aruba y Merca, con un turista di 13 aña procedente di Massachusetts a perde su bida ora cu e tabata Tubing, a cay y boto a pasa riba dje, y chapaleta a kita su braza afo, ta hopi detaye extra a bin encuanto e caso aki.
Cassidy Murray di 13 aña a lucha pa su bida, sinembargo Paramediconan na beach no a logra stabiliza su curpa y eybao mes el a fayece.
E siman aki, e canal 10 di e stacion local di NBC na Boston, a logra haya un pareha turista kendenan tambe a pasa den un situacion serio na Palm Beach durante Parasailing. Y nan a descubri cu ta e mesun compania di Watersport cu a causa nan tragedia, ta meti tambe den e morto di Cassidy.
E pareha awendia ta cana cu varios plachi metal den nan cara, cu scruf, y tambe awor tin problema cu bista, y keto bay nan ta sigui pasa den proceso di operacion y demas cirugia. E heridanan cu nan a ricibi durante e Parasailing aki, ta impactando nan bida.
Ta trata aki di Morelle y Suzanne Crawford kendenan ta biba na estado di Maine. Nan tabata na Aruba durante November 2021 y a bin nota cu e mesun compania di Watersport envolvi den nan tragedia, tambe ta esun meti den e asunto di Cassidy.
E aventura di parasailing di nan abordo di ‘Fun 4 Every 1’ Watersports a bay malo, ora cu apenas nan a caba di subi 8 pa 10 pia den halto, cu esaki a kibra y nan a cay duro den lama. Un cantidad di weso den nan cara a keda fractura, y e cachete di Suzanne tambe a kibra.
E pareha a relata tur nan storia na e noticiero di NBC10 na Boston, y a menciona cu e compania Fun 4 Every 1 ta e mesun cu e teenager Cassidy Murray a usa y cu a sali fatal pe.
Segun e pareha a bisa e canal di TV, cu ora nan a mira e noticia y kico a pasa cu e dama hoben di 13 aña, cu nan a sinti nan mes masha horible mes.
“Mi no por saca e cos aki mas for di mi cabez. Mi ta pensando, si ningun hende a atende e asunto aki despues cu e accident aki a pasa cu nos y e compania aki?”
E pareha di Maine mientras tanto ta usando e abogado David Angueira di Boston, pa atende e asunto y busca compensacion di e compania Fun 4 Every 1 di Aruba, pasobra te cu awor e gastonan medico ta casi yega 250.000 Dollar.
Den siman cu a pasa, ta diferente hende na Aruba a expresa loke a pasa riba lama. Na algun emisora a hasta tende con ciudadanonan ta pidi pa haci ‘Drug Test’ sorpresivo y obligatorio pa tur trahador di Watersports. Riba Diahuebs, ta diferente miembro di Parlamento na Aruba a haci pregunta riba e asunto di Watersports. Un Parlamentario a hasta presenta un mocion riba e asunto aki.
