ORANJESTAD (AAN): Diaranson anochi ultimo, un cantidad grandi di turista y localnan a presencia e nacemento di turtuga riba Eagle Beach y por a mira con turtuganan a bay lama mesora.
Esaki tabata un experiencia unico. Por a mira algun turista cu lagrimanan na wowonan, como tambe un aplauso fuerte na momento cu e prome turtuga a yega cant'i lama. Algun tabata bisa "they're so cute!" y un mucha hasta a pidi su mayor si e por a bay cas cu un.
Boluntarionan di Turtugaruba Foundation tabata atento pa e nacemento y a cera un baricada pa e turtuganan yega lama.
Tin 4 especie di turtuga cu ta pone webo na Aruba: Leatherback, Loggerhead, Green and Hawksbill. Nan ta pone webo for di maart te cu october. Pues e periodo cu e turtuganan chikito ta sali for di webo ta entre mei y december.
Tur aña tin 5% menos turtuga ta yega nos playa y ta bira un tarea di cada ciudadano pa proteha un especie asina stima.
