ORANJESTAD (AAN): Jeannette Amanda Jaqueline Paduchowski di 87 aña di edad, a fayece Diadomingo siman pasa na Mass General Hospital na Boston, rondona pa su famia.
El a nace na Lawrence (Massachusetts) y a gradua di Lawrence High School na 1954. El a conoce su casa Richard na John Tarbox School, y a casa na Augustus 1958.
Jeannette a cria seis yiu, y su nieta Krista cu kende e tabata hopi cerca mes. E tabata cuida su cas y maneha finanzas di Penn’s Pharmacy cu su casa Richard tabata doño di dje. Como cu Jeannette no kier a acepta pa laga su yiunan wordo cuida pa otro hende, e tabata hopi activo pa cuida tur su nietonan. E tabata babysit e nietonan hasta ora e tabatin riba di 70 aña di edad.
Despues cu nan a bay biba na New Hampshire, Jeannette a bay tuma les di rijbewijs y finalmente cu 50 aña di edad a obtene su prome rijbewijs. Segun su yiunan, nunca Jeannette tabatin miedo di algo.
Jeannette y Richard tabata doño di un Timeshare na Aruba, y pa 20 aña largo tur luna di September, nan tabata bin Aruba. Y ora nan bay cas bek, nan ta papia di Aruba constantemente. Si bo tende nan papia encuanto Aruba, bo ta compronde cu esaki tabata nan cielo riba tera pa nan.
E ultimo biaha cu nan a bishita Aruba como famia tabata na 2015. Su casa Richard a fayece na 2019.
Jeannette su deseo tabata pa hendenan no bay lamenta su morto, pero mas bien e kier pa dia cu e muri, su yiunan organiza un fiesta pa celebra su bida. Su fiesta a tuma lugar Diasabra (25 di September) na cas di Jeannette na Danville, New Hampshire.
