ORANJESTAD (AAN); Informacion for di Manchester na Massachusetts na Merca, ta indica cu un turista cu cada invierno tabata pasa simannan largo di vakantie na Aruba, a caba di fayece despues di un bataya contra cancer.
E dama Judith May Gamble a fayece cu 83 aña di edad. Su casa Robert ‘Bob’ Gamble a fayece algun tempo pasa caba tambe.
Judith tabata casa pa 56 aña cu Bob, y a haya seis yiu. Cu Bob e tabata viaha tur temporada di Winter pa bin pasa vakantie na Aruba. Ora cu e no por bin Aruba, e ta bay Florida pa su vacacion, paosbra e ta gusta e ambiente caluroso riba e isla aki.
Pa Judith, famia tabata e factor mas importante di su bida. Pesey e tabata hopi envolvi den bida di su yiunan, como tambe di su nietonan.
Diabierna 7 di Januari den oranan di mainta lo bay tin entiero na First Parish Church na Manchester.
