ORANJESTAD (AAN); Cada winter e ta bin pasa lunanan largo di vacantie na Aruba! E tabata gusta bay hunga poker cu su amigonan cu ta bin cune Aruba, y tambe den Casinonan.
Diasabra cu a pasa, Daniel R. Strabone a fayece inesperadamente na Portsmouth, New Hampshire na Merca cu 82 aña di edad.
E ta originalmente di Peabody (Massachusetts), y ultimo tabata biba na Exeter, New Hampshire.
El a nace na Boston, y na 1956 a drenta US Navy unda el a sirbi riba e barco USS Willis A. Lee pa 3 aña. Despues el a casa cu su amor Louise na 1960 y a bay biba na Peabody unda el a residencia pa 40 aña, y a bira un Bombero y na final a retira como Capitan.
E tabata referee di weganan di Football, Baseball, y tambe Hockey.
Pero su pasatempo favorito tabata Aruba. Pa diescinco winter consecutivo e tabata bishita Aruba.
El a bay lagando atras un yiu homber y dos yiu muher. Su entiero lo ta Dialuna awor na Conway, Cahill-Brodeur Funeral Home na Peabody pa 10’or di mainta, sigi pa un Misa pa 11:00 am na St. John’s Church na Peabody.
