BANGKOK: Un pasahero femenino a perde parti di su pia robez ora cu diripiente esaki a pega na un pida di un pasarela electrico, creando un escena di pesadiya na e Aeropuerto aki na Thailandia.
E pasarela aki ta wordo oficialmente yama ‘Travelator’.
E turista no-identifica mester a viaha riba un vuelo nacional for di Don Mueang International Airport na Bangkok rumbo pa e provincia zuid di Nakhon Si Thammarat, ora cu el a trompica riba su mesun maleta roos riba e pasarela aki pa 8:30 am.
Su pia robez a cuminza wordo pusha den e mecanismo net na final di e pasarela. Aki e aparato a keda ranca e pia, strangulando e organo rancando na e cuero, e musculo, y e wesonan, mientras e pasahero femenino tabata grita di dolor.
Demas pasaheronan a core yega cerca y primi e boton di emergencia pa stop e aparato.
Personal di mantenimento, y paramediconan a yega eynan. A forma un team medico cu finalmente mester a amputa e pia robez di dje, for di riba e rudia. Asina porfin a librer’e di eybao, y a hibe cu urgencia pa un Hospital pa purba pega su pia bek. Como cu ey nan no por hacie, a transferi e pasahero femenino pa Bhumibol Adulyadej Hospital cu e speranza cu ey si nan por haci esey.
Gerencia di Aeropuerto a ordena un investigacion pa determina e causa di accident. E maleta benta abao banda di dje falta 2 wiel, y e plachinan geel parecido na un peña a wordo haya kibra, siendo cu nan ta cubri e parti final di e belt unda cu e pasarela ta caba.
A sali na cla cu gerencia di Aeropuerto a bay bishita e pashent na Hospital, unda e ta hospitaliza pa sigui ricibi tratamento. Aeropuerto a laga sa cu nan a asumi responsabilidad y lo bay acepta pa paga tur gasto di docter y compensacion.
Aeropuerto a bisa cu ningun vuelo a sufri retraso debi na e accident aki. E pasarela electrico mes ta paga awor pasobra ta bay revisa esaki completamente.
