AHATA ta notando tur esaki
ORANJESTAD (AAN): Aña 2022 ta demostra cu di berdad e ta e aña di recuperacion! Asociacion AHATA tambe a bin ta notando e desaroyo positivo den e prome tres lunanan.
Tisa LaSorte kende ta President y CEO di Aruba Hotel and Tourismo Association (AHATA), a mustra satisfecho cu den luna di April 2022, ya caba e ocupacion di hotel na e isla a casi yega e nivel (100%) cu e tabatin na April 2019. Y awor sigur luna di Mei ta yuda cu Aruba ta recupera completamente.
E turistanan cu ta rumbo pa Aruba, principalmente ta bin for di Merca. E demanda pa bin pasa vakantie aki ta grandi, y e isla ta tratando na diversifica un tiki.
Aunke tin hopi turista kier bin for di Merca pa Aruba, toch un di e problemanan cu ainda tey ta cu hopi compania den mundo di turismo ta confrontando e hecho cu nan tin falta di empleado. Pues keto bay ta dificil algun caminda pa pone full e servicio bek na e nivel normal y completo.
Turismo ta bek na su nivel, y e actividadnan rond di esey tambe. Hotelnan ta yen, y restaurantnan tambe ta yen pa sirbi huespednan. Toch tin algun negoshi cu keto bay tin problema pa por pone e servicio full bek manera cu debe ser, como cu no por haya empleado pa cubri e cuponan habri.
Cada biaha cu bo tende un compania of Hotel mustra cu nan tin cupo di trabao habri, bo ta haya hende desemplea ta keha cu nan no por haya empleo.
E keho ey por ta bin debi na varios factor. Hecho ta cu tin hopi hende desemplea cu “no kier” haci cierto trabao! Nan ta buscando trabao, pero no kier haya empleo den sector di hospitality, y feedback cu ta ricibi durante entrevistanan di trabao ta cu e hendenan no kier traha weekend, nan no kier traha anochi, y debi na esey nan no kier traha den hospitality cu ta un area di servicio cu ta 24/7.
Tambe ta pasa cu tin persona cu no ta cualifica pa e trabao tampoco! Pesey tin biaha bo ta haya hende ta bisa cu e no por haya trabao, siendo cu awendia pa hopi trabao bo mester tin un actitud cu bo ta dispuesto pa haya entrenamento, cla pa yuda soluciona problema, y tambe dispuesto pa traha tur shift di trabao.
