Dia Internacional di Turismo y e realidad di futuro di turismo - *E Epoca di Oro despues di Segunda Guera Mundial a habri caminda - *Futuro di turismo y e retonan mundial cu Aruba tambe conoce
ORANJESTAD (AAN): Na momento cu e pandemia Covid-19 a presenta su mes, mundo a cera un parti di historia cu a origina den su reconstruccion despues di Segundo Guera Mundial.
Mundo hamas tabata mescos cu e momentonan prome cu Segundo Guera Mundial a bira uno di e eventonan mas hororoso cu historia humano a conoce.
Despues di guera mester a reconstrui un mundo, cu tecnologia a haci mas chikito pero tambe a uza sumanan enorme pa crea un economia nobo.
Golden Age, e epoca di oro cu Segundo Guera a habri, a bira portador tambe di e cambionan mas grandi di Siglo 20 y a produci un era, cu na 2020 Covid-19 a basha abou.
Turismo a nace como producto di Golden Age, di e epoca cu hende tabata tin placa pa haci biahenan di placer y tambe conoce otro partinan di mundo, cu tecnologia moderno di comunicacion a haci conoci.
Turismo tabata basa riba un mundo di fantasia, cu tabata haci hende sinti nan mes rey cu e placa cu nan tabata paga. Hopi negoshi nobo a habri a base di turismo.
“Tax free” tabata loke a pasa posibel pa turistanan gasta placa na productonan cu tabata mucho mas caro na nan pais, manera tabata e caso cu joyas y perfume.
Asina turismo a bira base economico di hopi pais, pero sigur di Aruba cu tabata tin algo mas pa ofrece.
Aruba a ofrece e turista e esencia di Aruba, conoci como Arubianismo, marca pa cordialidad.
Na Aruba e turista por a papia su idioma sin problema cu hende no por a comprende den un tempo cu e hecho cu e Arubiano tabata multilengual tabata algo special.
Turismo a conoce cambionan grandi den transcurso di tempo, cu a trece tambe cambio den e bida social na comunidadnan nobo.
Con fragil turismo ta, a wordo demostra dor di e Pandemia Covid-19 cu a afecta turismo seriamente.
Awe mescos cu cantidad di pais na mundo, Aruba mester sigui dilanti cu un turismo cu a conoce cambio grandi, manera DIARIO a anticipa.\
Turismo, mescos cu tur sector economico y tur loke ta mara na hende, conoce cambio, mihor dicho evolucion.
Turismo actual ta trece turista di e categoria di prijs mas halto pero tambe hende cu ta keda na cas di amigonan pa asina cera conoci cu Aruba cu den un epoca nobo mester sali dilanti despues di Pandemia.
Pero futuro no ta sin reto grandi. E reto di mas grandi cu Aruba ta confronta ta e reto di clima. Aruba mester cuminsa adapta su mes na cambionan den clima, cu lo afecta e loke turista ta bin busca cu ta e naturalesa unico di Aruba den cual e hende di Aruba, e mentalidad di Arubianismo, ta keda central.
Ta cu bista riba futuro mester corda contra turismo a nace ora mundo a despedi di e horor di Segundo Guera Mundial.
Awe na loke mester spera cu ta despedida di Covid-19, hunto mester traha riba e base di futuro yena cu oportunidadnan pa Arubianonan cu kier sigui pa un futuro nobo cu ta spera na horizonte.
