Ronella Croes, CEO di ATA:
- Turismo di Aruba ta bayendo bon
- ‘Booking Window’ si a bira poco mas corto
ORANJESTAD (AAN) CEO di Aruba Tourism Authority, Ronella Croes, den entrevista cu Matutino DIARIO, a comparti diferente cifra di loke ATA sa, tocante con Aruba su turismo ta bayendo.
Ronella Croes a señala cu ATA tin diferente fuente pa midi esaki. “Nos ta bay na tur operador den diferente mercado cu ta bende Aruba, nos ta bay na e aerolineanan wak con e demanda ta bayendo, y tambe na hotelnan wak con e grado di ocupacion y demanda ta bayendo. Y, incluso, nos tin diferente combersacion cu operadornan na Aruba, tambe”, CEO di ATA a indica.
Croes a duna di conoce cu siman pasa ATA tabata tin reunion (cu stakeholders), den cual nan a papia di Nort America, y eynan nan a pasa den henter e sala y a puntra cada un di su socionan, incluso tur operador, con ta bayendo.
“Y loke bo ta haya si, ta cu tin hopi negoshi ta drentando mas cerca di fecha di biahe. Pues, den terminologia di turismo nos ta papia di e ‘booking window’. E booking window pa Aruba, normalmente ta tres luna for di Merca, y aworaki por mira cu esaki ta hopi mas corto. E hendenan ta tuma mas tempo, prome cu dicidi cu ta bay efectua un biahe, y ‘ok, laga mi haci e pago’. Pues, esey tur nos socionan ta mira. No ta algo di awo, pero na Mei caba, nos a cuminza señala esaki”, Ronella Croes a expresa.
Ronella Croes ta mira esaki como e refleho di un cambio cu por bisa enberdad, cu hendenan ta un tiki mas cauteloso prome cu nan tuma e decision. “Pero cu nan ta tuma e decision. Si! Si nos wak e prome mitad di e aña aki, nos por mira cu Aruba su turismo a crece cu 3.3%, bo por mira un Merca cu a keda stabil; y mi ta bisa stabil den termino di proyeccionnan cu nos a bin ta haya, unda cu varios destino den Caribe, no tur, pero varios y sigur esnan cu ta mas grandi, ta mirando un reduccion di turismo for di Merca, y Aruba ta manteniendo locual nos sa cu a logra aña pasa, cu ta un mercado hopi fuerte”, Ronella Croes, CEO di ATA, a splica.
El a agrega cu mester tene cuenta cu ora di papia di Merca, tambe tin cu corda cu nos mes akinan, nos ekipo na Aeropuerto, ta haci un esfuerzo inmenso pa por acomoda vuelonan, mirando e capacidad limita, principalmente na e momentonan peak di e mercado Mericano. “Pero contal, Merca a keda stabil”, Ronella Croes, a señala.
