CEO di ATA Ronella Croes ta relata:
- Di 2011 pa 2023 door di ‘Tourism Receipts’ entrada directo a subi 94%
- 4.7 biyon Florin turismo a genera den ‘Tourism Receipts’ aña pasa
ORANJESTAD (AAN) Den conferencia di prensa, señora Ronella Croes, CEO di Oficina di Turismo di Aruba (ATA), a haci un presentacion di e informe anual di ATA pa aña 2023. El a cuminza cu un sinopsis di e momento cu ATA suigeneris a nace na 2011 y su crecemento te 2023.
Na prome lugar, Ronella Croes a duna un relato tocante ATA Suigeneris. “Na aña 2011, ATA a bira un aparato independiente, nos a converti nos mes den ‘Aruba Tourism Authority Suigeneris’. Esey ta haci di ATA un entidad unico; nos ta independiente den e esfera publico, y nos ta unico tambe mirando nos tarea y nos responsabilidadnan cu ta exclusivamente pa ATA; entre otro, mercadeo internacional, pero tambe e hecho cu nos tin oficinanan afo. Esaki no ta usual den e categoria di esfera publico”, CEO di ATA a señala.
Croes a indica cu ATA tin oficinanan na Merca, Hulanda y na Colombia den cualnan e ta eherce parti di su trabao, y mester tene cuenta aki cu Aruba ta worde promovi den mas di 15 diferente pais. “Den cada pais bo tin inversion como tal, y bo tin representacion tambe. Pues, esaki ta haci di ATA unico y diferente, y cu un responsabilidad hopi basa internacionalmente tambe”, Ronella Croes a subraya.
Di 2011 te cu 2023: El a agrega cu ta bunita pa refleha un rato riba e momento di 2011 eynan, pero tambe con 2023, ATA den su etapa di turismo, ta compara su mes, por ehemplo, cu 2011 ora el a inicia cu su bachi como un entidad suigeneris.
“Pa mi cuminza cu e indicador, mi ta kere, mas importante ora ta trata exito den turismo, conforme su maneho, e indicador primordial ta loke nos ta yama e ‘Tourism Receipts’. E tourism in receipts ta worde registra y compila pa Banco Central di Aruba, e ta parti di e cuentanan nacional di Aruba, y esaki ta hopi importante pasobra ta e entrada directo pa medio di turismo. Pues no indirecto y tur e otro impactonan cu turismo ta representa pa Aruba, pero aki ta trata di entrada directo cu ta worde registra”, CEO di ATA, Ronella Croes a señala.
El a agrega cu si tira un bista riba e 4.7 biyon Florin cu turismo a genera den “Tourism Receipts” aña pasa, ATA ta premira cu si compara esaki cu e montante di aña 2011, por conclui cu “tourism in receipts” a subi cu 94%.
“Esaki ta hopi, hopi fuerte y esaki ta un di e tareanan principal di ATA. Pues e parti di papia di cantidad vs calidad, e ‘tourism in receipts’ ta papia di calidad”, CEO di ATA a remarca.
El a agrega cu si tira un bista riba e cantidad di bishitantenan, pues e volumen cu a yega aña pasa pa medio di avion, anto compara esaki unda ATA a inicia na 2011: ATA suigeneris, por conclui cu aki por mira un crecemento di 43%.
“Pues, pa mi para keto na e dos indicadornan aki caba, esey kiermen cu ‘Tourism Receipts’ su crecemento 2023 compara cu 2011, ta practicamente doble di e volumen cu bo a trece pa medio di avion a crece”, Ronella Croes, CEO di ATA a reitera.
Nos mercadonan: Profundisando den e rendimento di e mercadonan principal, por observa cu Merca a recupera cu 113%, Canada cu 119%, Colombia cu 160% y Hulanda cu 87% ora compara aña 2023 cu aña 2019.
Apesar di e retonan mundial cu ta sigui impacta e industria aereo di Merca, asina mes Aruba a logra aumenta nos capacidad di asiento cu 2% aña tras di aña, loke a resulta den un adicion di 23.537 stoel. Nos forsa di e marca Aruba, hunto cu e esfuersonan di A.T.A. y otro partnernan, a logra cu aerolineanan bulando for di Merca pa nos isla a raporta un “load factor” di 94%. Esey sin duda ta marca un aumento di siete punto porcentual, si compara cu e añanan record na 2017 y 2019 ora e “load factor” a yega 87%.
Latino America, na su turno, a experencia un crecemento substancial, yegando un total di 180.000 stoel, marcando asina un aumento di 6% compara cu aña 2019 y 29% di aumento compara cu aña 2022. E crecemento aki ta impulsa pa vuelonan di Avianca, Copa y e rutanan nobo introduci door di Wingo.
E mercado Europeo a conoce un caida den vuelonan pa Aruba den aña 2023. Esaki door di un combinacion di factornan, incluyendo un cambio den e vuelonan disponibel y cu esaki reduccion den asiente aerio y un mercado Norteamericano robusto, cu a causa escasez di camber disponibel pa e mercado aki. Ora revisa e otro islanan den Caribe, mayoria tambe a conoce e mesun reto aki pa cu e mercado Europeo den aña 2023.
Hotelnan tabata mas yen: AHATA a informa cu e hotelnan a supera nan Tarifa Promedio Diario (ADR) di aña 2019 cu 24%. Tambe, nan entradanan basa riba cantidad di cambernan disponibel (RevPAR) a recupera cu 114% compara cu e nivel di aña 2019. Tambe e asina yama “Short-term vacation rentals” (STVR) a conoce un crecemento significativo den nan ADR cu un aumento di 55% compara cu aña 2019 y 17% ora compara aña 2023 cu aña 2022. E promedio di e nivel di ocupacion a aumenta di 49% na aña 2019 pa 57% na aña 2023. A.T.A. ta sigui boga pa un balans den representacion di tur categoria di acomodacion.
