Crisis team cu cambio den maneho entrante awe! - *Mester keda den cuarentena en espera di resultado apesar di ta vacuna
ORANJESTAD (AAN): Diabierna atardi Crisis Team a anuncia cu despues di evalua e risico cu Aruba ta core den e temporada di vakantie grandi aki, unda hopi local ta viahando pa exterior y tambe hopi turista ta viahando pa Aruba.
A tuma e desicion di trece cambio den e Ministeriële Regeling nobo cu ta drenta na vigor entrante 17 di juli y e cambio ta encera cu tur persona sea residente of turista cu ta viaha pa Aruba for di un pais cu ta cay bou di e consideracion di ta un pais di riesgo halto, mester haci un PCR test sea 72 ora prome cu viaha of na su yegada na Aruba y keda den cuarentena en espera di resultado apesar di ta vacuna cu dos vacuna.
E cambio di maneho aki ta di sumo importancia mirando e aumento di casonan di COVID-19 ocasiona pa e variante di DELTA den otro paisnan.
Paisnan cu ta wordo considera di risico ta halto ta: Seychelles, Cyprus, Fiji, Mongolia, Tunesia, Namibia, United Kingdom, Colombia, Cuba, Kuwait, Argentina, Spaña, Botswana, South Africa, Hulanda, Oman, Georgia, Costa Rica, Portugal, Malaysia, Panama, Suriname, Andorra, Brasil, Maldives, Kyrgyzstan, Iran, Iraq, Luxembourg, Lybia, Paraguay, Greece, Uruguay, Russia, Kazakhstan, Malta, United Arab Emirates, Chile, Saint Kitts & Nevis, Monaco, Indonesia, Zimbabwe, Guatemala, Bahamas, Trinidad & Tobago, Ireland y Denmark.
